La cumissiun predeliberanta dal cussegl grond è s'occupada da la revisiun parziala da la lescha introductiva tar il dretg d'obligaziuns svizzer. La cumissiun recumonda unanimamain d'acceptar la proposta ch'è vegnida suttamessa.

Sut il presidi dal president da la cumissiun Franco Quinter ha la cumissiun per economia e taxas (CET) predeliberà la missiva da la regenza tar la revisiun parziala da la lescha introductiva tar il dretg d'obligaziuns svizzer (LItDO) per mauns dal cussegl grond. Il cussegl grond vegn a tractar questa fatschenta en la proxima sessiun da favrer 2010. Preschent è stà er cusseglier guvernativ Hansjörg Trachsel, schef dal departament d'economia publica e fatgs socials.

La revisiun parziala da la LItDO ch'è vegnida suttamessa n'è betg vegnida contestada da la cumissiun ed ella recumonda al cussegl grond unanimamain d'acceptar la proposta. La revisiun parziala pertutga il register da commerzi. L'ultima revisiun dal dretg d'obligaziuns e da l'ordinaziun davart il register da commerzi sin plaun federal pretenda pia in'adattaziun dal dretg chantunal, perquai che las incumbensas giudizialas ch'èn vegnidas stgaffidas da nov ston vegnir francadas en ina lescha chantunala. Perquai che la creaziun d'ina nova lescha n'è betg bainvegnida or da vista da la sistematica, propona la regenza d'integrar l'ordinaziun executiva chantunala davart il register da commerzi en la LItDO e da l'adattar a las prescripziuns federalas. Questa moda da proceder resguarda la cumissiun predeliberanta sco correcta, perquai che las finamiras previsas – la realisaziun da las prescripziuns federalas, il scleriment svelt e simpel da la situaziun giuridica, ina legislaziun concisa ed ina procedura favuraivla e svelta – pon vegnir cuntanschidas uschia.


Infurmaziuns:
president da la cumissiun Franco Quinter, tel. 079 682 47 47


Gremi: cumissiun per economia e taxas
Funtauna: rg cumissiun per economia e taxas