Es sia ultima sesida è la regenza s'occupada da la consultaziun a la confederaziun tar la lescha davart la lavur cun giuvenils. Ella approvescha da princip las finamiras tematicas da la revisiun totala, fa dentant grondas resalvas visavi la politica da finanzas.

La revisiun totala da la lescha davart la lavur cun giuvenils vegn approvada
La regenza grischuna sustegna da princip la revisiun totala per ina lescha davart la lavur cun giuvenils che vegn proponida da la confederaziun. Questa lescha stgaffescha ina basa adequata per adattar la lescha davart la lavur cun giuvenils che datescha da l'onn 1989 a las cundiziuns generalas actualas da la societad. Cun las finamiras tematicas è la regenza da princip perencletga, ella fa dentant grondas resalvas visavi la politica da finanzas. Ella refusa grevezzas finanzialas supplementaras per ils chantuns e per las vischnancas.
Sco che la regenza constatescha en sia resposta da consultaziun è la furmaziun ordaifer la scola in element central da la promoziun d'uffants e da giuvenils. En spezial perquai ch'ella ha in effect preventiv ed integrativ. Areguard il cuntegn èsi perquai impurtant che las purschidas vegnian concepidas en moda cumplementara a la scolaziun. En vista a las cundiziuns generalas da la societad ch'èn sa midadas sco er en vista al potenzial da promoziun per uffants pli giuvens beneventa la regenza expressivamain l'extensiun da la gruppa che la promoziun d'uffants e da giuvenils prenda en mira er ad uffants da la vegliadetgna da scolina (4 – 6 onns).
Per pudair utilisar la chapientscha cumplessiva da la furmaziun ch'è vegnida proclamada en connex cun la "societad da savida" e per la pudair coordinar meglier cun las purschidas da furmaziun, propona la regenza plinavant da plazzar l'organisaziun da la promoziun da giuvenils plitost en il sectur da la furmaziun e da la perscrutaziun enstagl da tar l'uffizi federal d'assicuranzas socialas. La finala envida la regenza – en vista a la mancanza da spezialistas e da spezialists sco er da studentas e da students da direcziun tecnica u scientifica – d'examinar, cur ch'ils projects vegnan determinads, sch'i dat pussaivladads per motivar pli fitg ils giuvenils per projects dals secturs da la tecnica u da las scienzas natiralas.

Da vischnancas e da regiuns

• Mustér: Il project "Rempars da lavinas Val Mala" vegn approvà. Als custs vegn garantida ina contribuziun da maximalmain 160'600 francs.
• Vuorz: Il project "Sanaziun da la punt dal Rain a Vuorz staziun" vegn approvà. Als custs vegn garantida ina contribuziun da maximalmain 1'240'200 francs.
• Beiva: La revisiun parziala da la planisaziun locala dals 14 da december 2009 vegn approvada.
• Sagogn: La regenza approvescha la revisiun parziala da la constituziun communala ch'è vegnida concludida ils 11 da december 2009.
• Schiers: La revisiun parziala da la constituziun communala dals 27 da november 2009 vegn approvada.
• Zernez: La revisiun parziala da la planisaziun locala da la vischnanca da Zernez, ch'è vegnida concludida ils 30 d'october 2009, vegn approvada.

Contribuziuns chantunalas a differentas instituziuns

• CVDRG: A la corporaziun da vischnancas per la dismessa da rument en il Grischun (CVDRG) vegn garantida ina contribuziun da maximalmain 530'253 francs per construir la centrala da chalur a distanza. La construcziun da la centrala da chalur a distanza serva al provediment da la rait da chalur a distanza planisada en direcziun da Cuira.

Gremi: regenza
Funtauna: rg chanzlia chantunala dal Grischun