La cumissiun da gestiun dal cussegl grond (CdG) vul examinar il cas Reinhardt en moda speditiva e fundada. A sia sesida ha la CdG survegnì emprimas infurmaziuns, discutà l'ulteriur proceder e decidì d'installar ina giunta speziala per in'examinaziun detagliada.

Ils 26 da schaner 2010 è il cumandant da la polizia chantunala dal Grischun, colonel dr. Markus Reinhardt, sa privà da la vita. En il rom da la surveglianza parlamentara vegn la cumissiun da gestiun dal cussegl grond (CdG) ad examinar quest cas tragic en moda speditiva e fundada. Ella è sa laschada orientar tras la cussegliera guvernativa Barbara Janom Steiner, scheffa dal departament da giustia, segirezza e sanadad, davart las circumstanzas da quest mortori. Suenter questa orientaziun na datti per la CdG nagins indizis per in cumportament giuridicamain sbaglià.

Per l'ulteriura examinaziun vegn installada ina giunta speziala da la CdG che vegn presidiada dal deputà Marcus Caduff, PCD, ed a la quala appartegnan las suandantas commembras ed ils suandants commembers da la CdG: deputà Jakob Barandun, PLD; deputada Agnes Brandenburger, PPS; deputada Tina Gartmann-Albin, PS; deputà Cristiano Pedrini, PBD. Per sustegnair la giunta en dumondas organisatoricas duai vegnir engaschada ina persuna d'ordaifer il chantun che ha experientscha cun examinaziuns. La giunta speziala vegn a far scleriments detagliads e vegn a cumenzar cun sia activitad ils proxims dis cun l'audiziun d'ulteriuras persunas che san dar infurmaziuns. En dependenza da l'examinaziun vegn la CdG ad infurmar uschè baud sco pussaivel, cur ch'ils resultats da l'examinaziun èn avant maun e valitads.

Sco unica persuna d'infurmaziun è vegnì designà il parsura da la giunta speziala da la CdG.


Infurmaziuns:
Marcus Caduff, parsura da la giunta speziala da la cumissiun da gestiun, tel. 079 304 70 91


Gremi: cumissiun da gestiun
Funtauna: rg cumissiun da gestiun