A chaschun da sia ultima sesida è la regenza sa fatschentada cun differentas consultaziuns federalas. Ella ha formulà sias posiziuns tar la nova lescha davart la protecziun da perditgas sco er tar la renovaziun da la legislaziun da polizia.

La nova lescha federala davart la protecziun da perditgas vegn sustegnida
En quai che reguarda sias finamiras e sia concepziun beneventa la regenza grischuna per gronda part il sboz da la lescha federala davart la protecziun da perditgas. Ella sa dosta dentant cunter las grevezzas finanzialas supplementaras che resultassan per ils chantuns. Il sboz da lescha serva a realisar la convenziun dal cussegl da l'Europa per il cumbat dal commerzi cun umans.
Per cumbatter u per evitar il commerzi cun umans duai il project stgaffir disposiziuns pli liantas per ils secturs protecziun da victimas e protecziun da perditgas sco er in mecanissem da surveglianza independent. Uschia fixescha il sboz da lescha las structuras e la basa giuridica per realisar programs per la protecziun da perditgas. Sco che la regenza scriva en sia resposta da consultaziun a la confederaziun, sustegna ella la soluziun tschernida per in model federal. Tenor quel duain programs per la protecziun da perditgas vegnir reglads en l'avegnir en moda unitara tras in post central federal per la protecziun da perditgas.
La regenza na va dentant betg d'accord cun la finanziaziun previsa. Las expensas supplementaras che resultan tras la nova lescha davart la protecziun da perditgas stoppian vegnir surpigliadas respectivamain cumpensadas da la confederaziun. Quai correspundia er a la soluziun tschernida sco model federal ed er al detretschament da las incumbensas tranter la confederaziun ed ils chantuns.

La renovaziun da la legislaziun da polizia da la confederaziun vegn beneventada
La regenza grischuna beneventa il giavisch d'unir en in sulet relasch il dretg da polizia da la confederaziun ch'è actualmain fermamain sparpaglià entaifer il sistem giuridic. Quai menziunescha ella en sia resposta da consultaziun tar la nova lescha federala planisada davart las incumbensas polizialas da la confederaziun.
En il nov relasch vul la confederaziun reglar en moda cumplessiva las incumbensas e las cumpetenzas polizialas generalas sin il stgalim d'ina lescha. Uschia èsi pussaivel d'abolir cumplettamain plirs relaschs federals e d'eliminar duplicitads. Ord vista da la regenza na vegn questa finamira dentant betg cuntanschida dal tuttafatg, perquai che betg tut ils aspects n'èn vegnids integrads en il nov relasch giuridic.

Da vischnancas e da regiuns

• Bregaglia: La revisiun parziala da la constituziun dal circul da la Bregaglia vegn approvada.
• Alvagni: A l'uniun d'interess "Serenera Alvra" vegn garantida ina contribuziun da maximalmain 47'834 francs als custs supplementars per renovar e per engrondir la serenera ad Alvagni.
• Claustra-Serneus: Il project dal rempar da l'aual da Günscharüel da la vischnanca da Claustra-Serneus vegn approvà. Als custs vegn concedida ina contribuziun chantunala da 196'000 francs.
• Savognin: Il project forestal "Renovaziun da la veia d'alp" da la vischnanca da Savognin vegn approvà. Als custs vegn garantida ina contribuziun da maximalmain 1'382'500 francs.
• Savognin: La revisiun parziala da la planisaziun locala "zona per hotels Viols", concludida da la vischnanca da Savognin ils 26 d'october 2009, vegn approvada.
• Filisur: La revisiun parziala da la planisaziun locala da la vischnanca da Filisur dals 13 da mars 2008 e dals 25 da zercladur 2009 vegn approvada.
• San Murezzan: La revisiun parziala da la planisaziun locala "Prasüras" da la vischnanca da San Murezzan dals 29 d'october 2009 vegn approvada.

Projects da vias
La regenza ha approvà totalmain 4'280'000 francs per construir e per sanar ils suandants trajects da vias:
- via da Stussavgia: lavurs d'impressari e da cuvrida, tunnel Fatscha / punt Runggtobel
- via da Val S. Pieder: lavurs d'impressari, galaria da lavinas Camp I


Gremi: regenza
Funtauna: rg chanzlia chantunala dal Grischun