A partir dals 15 da mars 2010 vegn il center principal da traffic sin la punt da l'Obertor a Cuira transfurmà en ina rundella. A medem temp vegn reparada la punt che sto vegnir sanada. Ils custs da circa tschintg milliuns francs sa partan il chantun e la citad. La punt resta transibla, cun restricziuns, per il traffic durant las lavurs da construcziun che cuntinueschan fin il fanadur 2011.
 
L'access principal al center da Cuira passa oz sur l'axa da traffic Kasernenstrasse – Obertor – Grabenstrasse. Al passadi stretg da la Obertorbrücke sa chatta er anc la bifurcaziun en direcziun da Planeiras e d'Arosa. Durant il temp da grond traffic sa furman qua regularmain colonnas che impedeschan ils bus da las interpresas da traffic municipalas e regiunalas. En media circuleschan 18'000 vehichels mintga di sin quest traject, en temps da fulla èn quai fin 1'400 vehichels per ura. La segirezza da las pedunas e dals peduns sco er da las velocipedistas e dals velocipedists è fermamain en privel sin ils trottuars e sin ils vials stretgs.
 
La punt ad artg or da crap che traversa la Plessur datescha en ses origin da l'onn 1821, è en in nausch stadi architectonic e sto vegnir renovada urgentamain. La trav da betun armà ch'è vegnida agiuntada l'onn 1931 n'è betg pli suffizienta per las chargias dal traffic dad oz. Dapi ch'i manca ina isolaziun cunter l'aua da sal che resulta dapi ils onns sessanta da la rumida da la naiv cun sal da sdregliar e che ha in grond effect da corrosiun, èn ils tocs da metal a l'intern da la punt donnegiads correspundentamain. La punt è er in passadi impurtant per il grond dumber da conducts d'ovra sco gas, electricitad e telecommunicaziun.

Meglierar fundamentalmain la situaziun da traffic
La citad ed il chantun vulan profitar da la proxima sanaziun da la punt per meglierar fundamentalmain la situaziun da traffic al Obertor da Cuira. La punt vegn schlargiada sin 33 meters e cuntegna ina rundella elliptica confortabla cun in diameter da 25 respectivamain da 33 meters. Ils passapes d'omaduas varts da la punt vegnan schlargiads fermamain, e sut ils vials vegn construì in chanal transibel per ils conducts d'ovra. Ultra d'optimar la situaziun da traffic procura il nov passadi da la Plessur per ina valur urbanistica en la citad veglia istorica.
Ulteriuras infurmaziuns davart il project chattais Vus sin la pagina d'internet da l'uffizi da construcziun bassa sut www.tiefbauamt.gr.ch.


Infurmaziuns:
Peter Stirnimann, responsabel per las medias da l'uffizi da construcziun bassa, 081 257 37 11 / 079 291 72 75


Gremi: uffizi da construcziun bassa
Funtauna: rg uffizi da construcziun bassa