La confederaziun ha approvà ils 15 da mars 2010 il plan directiv "emprimas abitaziuns ed abitaziuns secundaras sco er alloschament turistic" ch'era vegnì concludì da la regenza ils 10 da november 2009. Il plan directiv chantunal oblighescha 35 vischnancas turisticas da relaschar fin mez 2013 mesiras adattadas per promover la construcziun d'emprimas abitaziuns e per diriger la construcziun d'abitaziuns secundaras.

Cun la planisaziun directiva chantunala èsi reussì tranter auter d'objectivar la discussiun davart la construcziun d'abitaziuns secundaras. La regenza ha pudì mussar che las abitaziuns secundaras n'èn en sasez betg negativas, mabain ch'ins sto differenziar tranter abitaziuns explotadas ch'èn degnas da vegnir promovidas e tranter abitaziuns betg explotadas che ston vegnir dirigidas. Questa vista differenziada ha fatg effect er sin plaun federal, grazia a l'approvaziun dal cussegl federal. Il rapport d'approvaziun descriva il plan directiv da princip sco adattà e sco cunvegnent.

Plinavant gida il plan directiv las vischnancas e las regiuns a crear spazi d'abitar favuraivel per las indigenas e per ils indigens ed er a meglierar las cundiziuns da basa per l'hotellaria.

Cun il plan directiv hai pudì vegnir mussà ulteriuramain ch'ils chantuns sezs èn pronts ed èn en il cas da prender las mesiras necessarias per promover la construcziun d'emprimas abitaziuns e per diriger la construcziun d'abitaziuns secundaras. La finamira è stada quella da prevegnir eventualas soluziuns federalas centralisticas cun consequenzas malsegiras. Per quest motiv è il chantun Grischun stà interessà da progredir cun las lavurs vi dal plan directiv en tala moda che l'approvaziun dal cussegl federal ha pudì avair lieu avant che las chombras federalas èn puspè s'occupadas da l'aboliziun da la lex Koller respectivamain da las mesiras accumpagnantas areguard la planisaziun dal territori. Questas finamiras strategicas èn vegnidas ademplidas en vista a l'approvaziun dal cussegl federal che ha gì lieu ils 15 da mars 2010.

En il rom da l'approvaziun vegn il chantun dal rest envidà da dar l'attenziun duida al monitoring / controlling e da fixar valurs da finamira per il svilup da las abitaziuns secundaras en tut il chantun. Il monitoring / controlling dals proxims onns vegn a mussar, sche las mesiras che vegnan proponidas en il plan directiv vegnan a far effect e sch'il svilup va en la dretga direcziun, numnadamain en la direcziun da dapli abitaziuns explotadas e da damain abitaziuns betg explotadas (fraidas).


Infurmaziuns:
- cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 15
- Carlo Decurtins, giurist per la planisaziun dal territori, departament d'economia publica e fatgs socials, tel. 081 257 23 14

Gremi: departament d'economia publica e fatgs socials
Funtauna: rg departament d'economia publica e fatgs socials