Il chantun Grischun prevesa da metter en funcziun in nov center da transit per requirentas e per requirents d'asil a Cazas. La regenza grischuna ha deliberà la missiva correspundenta e dumonda il cussegl grond da conceder in credit d'impegn dad 1.8 milliuns francs per la cumpra e per la preparaziun da l'immobiglia. Il parlament vegn a tractar la fatschenta en la sessiun da zercladur.

Gia l'october 2009 ha il chantun Grischun acquistà ina immobiglia per la collocaziun da requirentas e da requirents d'asil a Riòlta sut, vischnanca da Cazas. En l'anteriur hotel/restaurant "Rheinkrone" pon vegnir collocadas fin 100 persunas. L'alloschi duai vegnir utilisà sco center da transit. La cumpra e la preparaziun da l'immobiglia sco center d'asil basegna il consentiment dal cussegl grond e suttastat al referendum da finanzas facultativ. La regenza propona al cussegl grond da conceder in credit d'impegn dad 1.8 milliuns francs. Il pretsch da cumpra è 1.6 milliuns francs e 200'000 francs èn previs per adattaziuns architectonicas.

Premissas optimalas
L'immobiglia a Cazas ademplescha optimalmain las premissas da manaschi e d'architectura per in alloschi collectiv per requirentas e per requirents d'asil. L'object che ha servì avant sco hotel è pront per abitar entaifer dus mais. Necessarias èn tschertas lavurs d'adattaziun e las mesiras da la polizia da fieu. L'urari prevesa da cumenzar il settember cun las lavurs d'adattaziun, uschia ch'il nov center da transit e pront per il november.

Dapli atgnas plazzas da collocaziun
In motiv per l'acquisiziun da l'alloschi è quel, ch'il dumber da las novas dumondas d'asil è anc adina grond. Al chantun Grischun vegnan attribuidas onn per onn 450 fin 500 persunas per la collocaziun e per l'assistenza. Il chantun è pront da procurar er vinavant sez per la collocaziun da las requirentas e dals requirents d'asil, empè da surdar quai a las vischnancas, e da distgargiar questas ultimas da lavur e da custs. Tras la cumpra da l'immobiglia vul la regenza ultra da quai concepir en moda pli equilibrada la relaziun tranter ils alloschis collectivs prendids a tschains ed ils agens. Actualmain è il chantun proprietari da mo 8 pertschient da las plazzas d'alloschi, 92 pertschient èn prendidas a tschains. Cun metter en funcziun il center da transit "Rheinkrone" s'augmenta la procentuala da plazzas en agens alloschis collectivs sin circa 140 letgs. Quai correspunda ad ina quota da proprietad da circa 25 pertschient dal basegn total.

Il chantun ha actualmain tut en tut passa 485 plazzas ch'èn destinadas per la collocaziun da requirentas e da requirents d'asil. Cun metter en funcziun sco previs il center da transit "Rheinkrone" a Cazas e l'alloschi prendì a tschains "Landhaus" a Tavau Laret s'augmenta la capacitad da collocaziun fin l'onn 2012 a temporarmain 705 letgs. L'onn 2012 duain probablamain vegnir liquidads ils centers da transit prendids a tschains "Schiabach" a Tavau e "Bergwald" a Planeiras cun lur total da 170 letgs, uschia che la capacitad da collocaziun vegn a sa reducir a 535 plazzas.

Realisaziun dal nov concept da collocaziun e d'assistenza
Tras l'utilisaziun da l'immobiglia "Rheinkrone" a Cazas sco center da transit fa il chantun l'emprim pass per realisar il concept da collocaziun e d'assistenza ch'è vegnì concludì l'onn passà. Quest concept ha l'intent da preparar las requirentas ed ils requirents d'asil sco er las persunas admessas provisoricamain che vivan en in center per l'emprima registraziun, per lur ulteriura dimora en il Grischun. Durant la procedura e fin a la decisiun davart la dimora u l'obligaziun da partenza da la Svizra collochescha il chantun la persuna en differents centers da transit. Suenter che la procedura è terminada arrivan las persunas ch'èn obligadas da partir da la Svizra en il center d'expulsiun. Là vegnan collocadas er tut las persunas che dumondan agid d'urgenza en il chantun Grischun e che survegnan mo pli in sustegn reducì.


Infurmaziuns:
- cusseglier guvernativ Stefan Engler, schef dal departament da construcziun, traffic e selvicultura, tel. 081 257 36 01
- cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01


Gremi: regenza
Funtauna: rg chanzlia chantunala dal Grischun