"Sanadad tenor las schlattainas: maletgs dal corp" è ina retscha d'occurrenzas transcunfinalas che vegn preschentada dals posts spezialisads per dumondas d'egualitad dal principadi da Liechtenstein, da la regiun dal Vorarlberg e dals chantuns Appenzell dador e Grischun dals 8 da zercladur fin ils 10 da november 2010. A Cuira han lieu gievgia, ils 17 da zercladur, e venderdi, ils 18 da zercladur, duas occurrenzas cun in'exposiziun "Zona libra da barbies" sco er cun referats davart il tema "Giuven, bain proporziunà e curunà da success?" en il center da furmaziun per la sanadad ed ils fatgs socials.

Oz vegn il corp perfetg celebrà da las medias sco norma. Il medem mument survegnin nus la missiva che nus pudain crear sezzas e sezs in corp perfetg – sche nus investin mo temp e daners avunda per quai. Tuttina paran las normas da las medias d'esser nuncuntanschiblas, en spezial sche nus considerain che las fotografias da supermodels èn retuschadas fermamain cun il computer.
Pertge vegn celebrà in tal cult enturn il corp? Tge effects ha la fixaziun sin la cumparsa corporala perfetga per nossa sanadad e per la conscienza da nus sezzas e da nus sezs, per la cuntentezza cun nus sezzas e cun nus sezs? Tge pretsch pajan mattas e mats, dunnas ed umens per cuntanscher in maletg dal corp ideal?
En questa retscha d'occurrenzas transcunfinalas "Maletgs dal corp" vulan ils posts spezialisads per dumondas d'egualitad s'avischinar a quest problem cumplex nà da la sanadad, da la psicologia e da la soziologia e mussar si las differenzas tranter las schlattainas.

Referats, exposiziun, films curts e preschentaziun "Il maletg dal corp en la reclama"
L'onn europeic per l'egualitad da las schanzas 2008 han ils quatter posts spezialisads dal principadi da Liechtenstein, da la regiun dal Vorarlberg e dals chantuns Appenzell dador e Grischun organisà e realisà la retscha d'occurrenzas "Medischina tenor las schlattainas: sanadad feminina – sanadad masculina".
Or da quai èn sa sviluppads quatter referats davart il tema dal maletg dal corp, ina exposiziun cun il titel "Zona libra da barbies" dal center da mattas Amazone da Bregenz, ina preschentaziun tar "Maletgs dal corp – realitads construidas da dunnas e d'umens en la reclama", films curts davart maletgs dal corp ed in test persunal davart la reflexiun dal maletg dal corp persunal.

Cumenzament il zercladur
Il Vorarlberg cumenza cun la retscha d'occurrenzas ils 8 da zercladur 2010 cun il tema "La pussanza dal maletg dal corp". Il Grischun cuntinuescha cun la retscha ils 18 da zercladur cun "Giuven, bain proporziunà e curunà da success?". Suenter la pausa da stad haja num ils 20 da settember en l'Appenzell dador "Betg pli giuven – anc betg vegl". Il Liechtenstein terminescha ils 10 da november 2010 questa retscha d'occurrenzas cun il tema "Daventar pli vegl – restar viscal".

Occurrenzas a Cuira

• Vernissascha da l'exposiziun "Zona libra da barbies" en il center da furmaziun per la sanadad ed ils fatgs socials (CSS) a Cuira, gievgia ils 17 da zercladur 2010, a las 17.00. Questa exposiziun po vegnir visitada venderdi, ils 18 da zercladur, da las 8.00 fin las 18.00.
• Occurrenza "Giuven, bain proporziunà e curunà da success?": referats: dr. med. Bettina Isenschmid "La fom feminina – aspects dal cumportament da mangiar specifics per la schlattaina en la cussegliaziun ed en la terapia" e Frank Luck "Mes corp mussa, tgi che jau sun … maletgs dal corp ed umens giuvens – Co pudess vesair ora in midavista?", che vegn suandà d'in apero, auditori dal center da furmaziun per la sanadad ed ils fatgs socials (CSS) a Cuira, venderdi, ils 18 da zercladur 2010, a las 18.00.

 

Infurmaziuns:
- Silvia Hofmann, manadra dal post da stab per l'egualitad da las schanzas, tel. 081 257 35 71 (ma, me, gie), e-mail: Silvia.Hofmann@stagl.gr.ch  


Infurmaziun per las medias:
Collavuraturas e collavuraturs da las medias che vulan rapportar da la retscha d'occurrenzas transcunfinalas "Sanadad tenor las schlattainas: maletgs dal corp" sco er da las occurrenzas a Cuira dals 17/18 da zercladur 2010 èn bainvegnids cordialmain.


Gremi: post da stab per l'egualitad da las schanzas
Funtauna: rg post da stab per l'egualitad da las schanzas