L'enquista "Co vai vinavant suenter la scola?" che vegn fatga mintga onn dapi l'onn 2004 mussa per quest onn resultats ch'èn tuttavia encuraschants. Tenor questa enquista reusseschan 82% da las scolaras e dals scolars da far senza problems la midada dal temp da scola obligatoric en in emprendissadi u en ina scola da cuntinuaziun. Il mument da l'enquista n'han mo 6.1 % dals giuvenils anc betg decidì davart lur scolaziun futura u n'han anc betg chattà ina soluziun correspundenta. Per la stad 2010 èn annunziadas actualmain en l'indicatur da las plazzas d'emprendissadi INPLEM 20% dapli plazzas d'emprendissadi sco libras che l'onn passà. En emprima lingia po quai vegnir attribuì al dumber da scolaras e da scolars ch'è sa reducì sco er a la purschida da plazzas d'emprendissadi ch'è anc adina buna.

Cun circa 70% sa chatta la quota da scolaras e da scolars ch'èn sa decidids per in emprendissadi sur la media dals ultims onns (ca. 65%). Cumpareglià cun lur cumpognas èn bler dapli scolars che bandunan la scola sa decidids da far in emprendissadi. Anc adina sisum la glista da las professiuns d'emprendissadi da tuttas duas schlattainas stat la scolaziun commerziala. In emprendissadi sco spezialista da commerzi en detagl AFQ resp. sco spezialista da sanadad AFQ suonda sin las proximas plazzas da las scolaras che bandunan la scola. Tar ils scolars suondan sin la plazza 2 l'electroinstallatur e sin plazza 3 il cuschinier AFQ. Quasi duas giadas uschè blers umens giuvens sco dunnas giuvnas planiseschan ina scolaziun cun ina maturitad professiunala.

Per l'enquista ch'è vegnida fatga la fin da l'avrigl han las persuna d'instrucziun da classa avisà 92 scolaras e scolars che n'han anc chattà nagina soluziun. Las experientschas dals onns passads dattan dentant curaschi er per quests giuvenils. Fin a l'enquista posteriura a la fin da quest onn da scola dastgass il dumber da scolaras e da scolars anc sa reducir fermamain. E quai betg sco ultim pervia dal sustegn tras la cussegliaziun professiunala dal chantun e tras ils coaches.

Per in onn intermediar (10avel onn da scola, onn social, praticum, segiurn per emprender ina lingua estra u autra soluziun) èn sa decidids 11% da las scolaras e dals scolars dumandads. Questa via è vegnida tschernida bler pli savens da dunnas giuvnas che d'umens giuvens. 11% han tschernì ina scola da cuntinuaziun. Er en quest cas surpassa il dumber da las dunnas giuvnas quel dals scolars che bandunan la scola.


Infurmaziuns:
Moreno Raselli, manader da partiziun da la cussegliaziun da professiun, da studi e da carriera, tel. 081 257 27 61, e-mail: moreno.raselli@afb.gr.ch  


Gremi: uffizi per la furmaziun professiunala
Funtauna: rg uffizi per la furmaziun professiunala