Sco ulteriur pass da la refurma dal turissem grischun lantscha l'uffizi per economia e turissem dal chantun Grischun in'offensiva da qualitad per segirar e per promover la qualitad. La finamira è da rinforzar – or da vista dal client – l'entira chadaina da servetschs en il turissem cun ina strategia da qualitad surordinada.

Dapi ch'il cusseglier guvernativ Hansjörg Trachsel ha lantschà il project da refurma "Structuras cumpetitivas e repartiziun da las incumbensas en il turissem grischun" l'onn 2006, èsi capità bler en il turissem dal Grischun. La furmaziun da destinaziuns regiunalas sco tala vegn garantida a lunga vista sin basa da differents projects parzials. La promoziun da la qualitad da servetschs è il project parzial il pli nov da la refurma dal turissem grischun.

Projects parzials accumpagnants
L'economia da turissem è ina pitga impurtanta en il chantun Grischun. Il project da refurma ha la finamira da gudagnar novs giasts per il Grischun e da segirar plazzas da lavur. Divers projects parzials, sco per exempel la plattafurma turistica electronica, la promoziun d'in turissem che s'accorda cun la natira e cun la cultura, sistems da direcziun e da monitoring tar destinaziuns u ina nova finanziaziun dal turissem per il Grischun, duain sustegnair questa finamira en moda durabla.

Finamira da l'offensiva da qualitad dal Grischun
En in pajais cun auts pretschs sco la Svizra è la qualitad da products e da servetschs d'impurtanza decisiva. Per pudair satisfar optimalmain als basegns da las clientas e dals clients èn necessarias purschidas da gronda qualitad. Ina strategia da bunmartgà n'è nagina alternativa per il turissem grischun. Regiuns turisticas cumpetitivas ston ademplir ils basegns dal giast meglier che tut ils auters purschiders. Quai che sa chapescha da sasez tar las interpresas industrialas, duai er daventar il standard dal turissem grischun: In'auta qualitad sin l'entira chadaina da servetschs creescha satisfacziun tar ils giasts e giasts cuntents turnan puspè. Cun ina strategia intenziunada per segirar la qualitad duai questa filosofia vegnir rinforzada e promovida. In sistem per il manaschament da la qualitad surordinà ch'integrescha differents furniturs da servetschs, dentant er las vischnancas e la populaziun, duai crear las meglras premissas persuenter. En il center stat la meglieraziun da la qualitad da servetschs tar las destinaziuns, tar singulas purschidas e tar interpresas. L'offensiva da qualitad vegn a sa basar sin models, sin certificaziuns e sin standards da qualitad ch'èn sa cumprovads e na vegn betg a crear novs sistems e labels.

Proxims pass
Il project parzial "offensiva da qualitad dal Grischun" ha lieu en duas fasas: En l'emprima fasa vegn elavurà in concept per la strategia chantunala da segirar la qualitad. Cun integrar ina gruppa accumpagnanta duain esser avant maun las basas fin la fin da l'onn 2010. Ultra d'ina filosofia e strategia da qualitad communabla èn manegiads cun quai er indicaturs da qualitad e recumandaziuns per mesiras. L'uffizi per economia e turissem vegn sustegnì da l'institut per turissem e temp liber da la SATE a Cuira (prof. dr. Philipp Boksberger), da l'institut da perscrutaziun per temp liber e turissem da l'universitad Berna (prof. dr. Hansruedi Müller) e da la tune management & training SA da Muri sper Berna (dr. Rolf Widmer). En ina segunda fasa duain las mesiras elavuradas vegnir realisadas intenziunadamain.


Infurmaziuns:
- Eugen Arpagaus, manader da l'uffizi per economia e turissem dal Grischun, tel. 081 257 23 77, 079 256 93 94
- Michael Caflisch, manader svilup turistic, uffizi per economia e turissem, tel. 081 257 23 73


Gremi: uffizi per economia e turissem
Funtauna: rg uffizi per economia e turissem