La nova legislaziun federala davart la protecziun dals animals prescriva che las possessuras ed ils possessurs da chauns ston absolver ina scolaziun teoretica e pratica. Suenter in termin transitoric vegn questa pretensiun a vegnir controllada a partir dal settember 2010 da las vischnancas ch'èn las autoritads cumpetentas per ils fatgs da chauns. A chaschun d'ina dieta ha l'uffizi per la segirezza da victualias e per la sanadad d'animals infurmà las represchentantas ed ils represchentants da las vischnancas davart in concept simpel ed efficazi per controllar quest nov attest.

Il 1. da settember 2008 è la nova ordinaziun federala davart la protecziun dals animals entrada en vigur. In element impurtant da questa midada da lescha è l'obligaziun da scolaziun ch'è prescritta per las possessuras e per ils possessurs d'animals. Uschia ston pudair preschentar en l'avegnir tut las possessuras e tut ils possessurs da chauns in attest davart las enconuschientschas da la materia (AEM). Quel survegnan ellas ed els suenter ina scolaziun teoretica e pratica. Uschia ston ellas ed els cumprovar ch'ellas ed els èn s'acquistads las enconuschientschas, co ch'ins tegna e co ch'ins tracta in chaun e ch'ellas ed els èn abels da manar in chaun en il mintgadi en moda controllada.

Questas prescripziuns da scolaziun valan atgnamain dapi il 1. da settember 2008. La confederaziun ha dentant concedì in temp transitoric da dus onns per las introducir. A partir dal 1. da settember 2008 ston pervia da quai tut las possessuras e tut ils possessurs da chauns absolver cun lur chaun questa scolaziun teoretica e pratica. Exceptà da quai èn las persunas che avevan cumprovadamain in chaun gia avant il 1. da settember 2008. Sche questas persunas s'acquistan però in chaun nov, ston ellas er absolver la part pratica da quest attest nov.

Necessitad d'ina scolaziun teoretica e pratica
Tenor las prescripziuns federalas ston tut las possessuras novas e tut ils possessurs novs da chauns che na possedevan il 1. da settember 2008 betg anc in agen chaun frequentar l'emprim in curs da teoria. Quel sto vegnir frequentà avant l'acquisiziun dal chaun nov e dura almain quatter uras.

Il curs pratic sto alura vegnir frequentà entaifer in onn dapi l'acquisiziun dal chaun. Quest curs che vegn frequentà cun l'agen chaun consista d'almain quatter unitads. El è obligatoric per tut las possessuras e per tut ils possessurs da chauns.

Tut ils curs en Svizra stattan sut la surveglianza da l'uffizi federal veterinar e vegnan purschids localmain en tut las regiuns. En il Grischun vegnan quests curs purschids en differents lieus.

Controlla tras las vischnancas
En il chantun Grischun èsi chaussa da las vischnancas da controllar, sche tut las possessuras e tut ils possessurs da chauns èn s'acquistads l'attest obligatoric davart las enconuschientschas da la materia. Per che questa nova mesira vegnia realisada en moda unitara entaifer il chantun, ha il post spezialisà per chauns da l'uffizi per la segirezza da victualias e per la sanadad d'animals dal Grischun elavurà in concept respectiv. Quel regla l'activitad da controlla e l'execuziun sin plaun communal da la scolaziun obligatorica da las possessuras e dals possessurs da chauns. La finamira è che las vischnancas possian far questa controlla cun structuras simplas e senza blera lavur administrativa supplementara. Il concept prevesa che las possessuras ed ils possessurs da chauns ston annunziar lur chaun nov fin a la vegliadetgna da sis mais tar la vischnanca. Il pli tard tar l'incassament da la taglia da chauns il segund onn suenter l'acquist d'in chaun ston las possessuras ed ils possessurs preschentar il nov attest obligatoric davart las enconuschientschas da la materia a las vischnancas per la controlla.

Per realisar quest concept e sco plattafurma da discussiun organisescha l'uffizi per la segirezza da victualias e per la sanadad d'animals mesemna, ils 9 da zercladur 2010, en il Plantahof a Landquart in di d'infurmaziun per las vischnancas. La finamira da la dieta è quella da mussar als posts administrativs da las vischnancas soluziuns pussaivlas per realisar l'execuziun da questa incumbensa. Uschia duai er la populaziun vegnir rendida attenta anc ina giada a l'attest davart las enconuschientschas da la materia "chauns" avant ch'il termin transitoric legal è scadì.

Sustegn da las vischnancas tras il post spezialisà per chauns
Per ademplir las pretensiuns da la legislaziun federala e chantunala davart il tractament da chauns ha l'uffizi per la segirezza da victualias e per la sanadad d'animals stgaffì gia l'onn 2008 in agen post spezialisà per chauns. Quel è responsabel per l'execuziun da la legislaziun en quest sectur. Quest post spezialisà duai er gidar a promover la collavuraziun cun las vischnancas e sustegnair ellas en l'execuziun da lur incumbensas en il sectur dals chauns.

En il center da sia lavur stat l'elavuraziun da tut las annunzias davart morsas da chauns e davart chauns cun in cumportament fitg agressiv en il Grischun. L'onn 2009 èn vegnids annunziads 154 cas da morsas da chauns en il chantun Grischun, nua ch'èn registrads tut en tut ca. 12'800 chauns. Quai correspunda ad in pitschen augment cumpareglià cun l'onn precedent. La nova lescha chantunala davart ils fatgs veterinars ch'è er entrada en vigur il cumenzament da l'onn 2008 prevesa che chauns cun in cumportament extraordinari possian vegnir suttamess ad in test da cumportament. Sch'in chaun vegn classifitgà sco privlus, pon las autoritads chantunalas ordinar las mesiras necessarias.


Infurmaziuns:
- Rolf Hanimann, veterinari chantunal, uffizi per la segirezza da victualias e per la sanadad d'animals, tel. 081 257 24 11
- Martin Lienhard, post spezialisà per chauns, uffizi per la segirezza da victualias e per la sanadad d'animals, tel. 081 257 24 23


Gremi: uffizi per la segirezza da victualias e per la sanadad d'animals
Funtauna: rg uffizi per la segirezza da victualias e per la sanadad d'animals