En il chantun Grischun duai il tractament da medicaments vegnir reglà da nov ed adattà a las directivas da la confederaziun. La regenza grischuna ha deliberà la missiva correspundenta per relaschar ina lescha introductiva tar la lescha federala davart ils medicaments ed ils products medicinals (lescha davart ils products terapeutics). L'intent da questa lescha è la protecziun da la sanadad tar il diever da medicaments. Il cussegl grond vegn a tractar la fatschenta en la sessiun d'avust 2010.

Dapi l'entrada en vigur da la lescha federala davart ils medicaments ed ils products medicinals l'onn 2002 è il tractament da medicaments reglà per tut la Svizra en moda unifitgada. L'ultima ordinaziun executiva tar la lescha davart ils products terapeutics ha la confederaziun mess en vigur per il 1. d'october 2006. Il chantun sto ussa adattar sias disposiziuns dal sectur da medicaments a la legislaziun federala.

En il champ da cumpetenza dals chantuns è restada la regulaziun dals manaschis da medicaments en il commerzi en detagl sco en spezial da las apotecas publicas e da las drogarias, dentant er da las apotecas privatas da persunas medicinalas sco er d'apotecas privatas dals ospitals e da las chasas da tgira. Qua è la confederaziun sa restrenschida a reglar tscherts secturs spezials, sco per exempel il martgà da spediziun, il scumond da far reclama e tschertas prescripziuns concernent l'inscripziun, concernent la consegna e concernent l'applicaziun da medicaments.

La protecziun da la sanadad tar il diever da medicaments
La proposta da la regenza da relaschar ina nova lescha introductiva tar la lescha federala davart ils medicaments ed ils products medicinals surpiglia per gronda part regulaziuns ch'existan gia. L'intent da questa lescha è en general quel da proteger la sanadad tar il diever da medicaments. Ella prevesa che tut ils manaschis da medicaments en il commerzi en detagl che vendan medicaments ston sa procurar ina permissiun dal chantun. Latiers tutgan apotecas publicas, apotecas privatas da dentistas e da dentists, d'ospitals, da clinicas e da chasas da tgira sco er drogarias. La lescha enumerescha las premissas da permissiun per ils differents secturs. Medemamain vegnan tut ils manaschis da medicaments che produceschan, che vendan u che depositeschan medicaments obligads da mantegnair in sistem per garantir la qualitad.

Ina permissiun dal chantun dovran ultra da quai er las apotecas publicas, las apotecas d'ospitals u las drogarias che produceschan medicaments. Per medicaments che vegnan producids tenor in'atgna furmla datti ultra da quai in'obligaziun d'als annunziar al chantun. Uschia pon las autoritads controllar en moda efficazia, sche quests preparats èn cumponids tenor il stadi da la scienza e tenor il stadi da la tecnica. Quai augmenta la segirezza dals medicaments e la protecziun da las pazientas e dals pazients.

La consegna da medicaments tras la media u tras il medi vegn reglada separadamain
La consegna da medicaments tras la media u tras il medi na vul la regenza betg reglar en la nova lescha introductiva tar la lescha davart ils products terapeutics. Las disposiziuns davart l'uschenumnada dispensaziun directa tras la media u tras il medi vegnan laschadas en la lescha da sanadad. Quai vegn fatg per considerar las posiziuns cuntraversas davart quest tema ch'èn vegnidas inoltradas durant la consultaziun da vart da l'uniun grischuna d'apotecras e d'apotechers e da l'uniun grischuna da medias e da medis. Tenor l'avis da la regenza na duai la debatta davart il sboz da la lescha introductiva tar la lescha davart ils products terapeutics qua avant maun betg vegnir engrevgiada d'ina discussiun davart l'opportunitad da la restricziun dal dretg sin ina dispensaziun directa tras la media u tras il medi e davart sia concepziun. Pervia da quai duai questa dumonda vegnir reglada en moda separada. L'aboliziun da la restricziun dal dretg sin ina dispensaziun directa tras la media u tras il medi vegn proponida en in project da consultaziun tar ina revisiun parziala da la lescha da sanadad ch'è vegnì elavurà dal departament da giustia, segirezza e sanadad. La consultaziun correspundenta è vegnida lantschada la fin da matg 2010.


Infurmaziuns:
cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01


Gremi: regenza
Funtauna: rg chanzlia chantunala dal Grischun