La regenza ha surdà il premi grischun da cultura 2010 a Georg Jäger. A medem temp ha ella concedì premis da renconuschientscha respectivamain da promoziun a 16 persunas che lavuran sin il champ cultural. Ultra da quai ha la regenza acceptà la nova cunvegna davart la collavuraziun per manar il portal d'internet ch.ch. La finala ha ella formulà sias posiziuns tar differents projects da consultaziun da la confederaziun.

Il premi grischun da cultura 2010 vegn surdà a Georg Jäger
La regenza ha surdà il premi grischun da cultura 2010 sco er set premis da renconuschientscha e nov premis da promoziun. Il purtader dal premi grischun da cultura 2010 ha num Georg Jäger. La regenza undrescha sias activitads multifaras a favur da l'identitad e da la cultura dals Gualsers dal Grischun sco er sias prestaziuns extraordinarias per la perscrutaziun da la cultura dal Grischun. Il premi è dotà cun 30'000 francs.
In premi da renconuschientscha da mintgamai 20'000 francs surdat la regenza a las suandantas persunas: Charly Bieler, Corin Curschellas, Anna-Alice Dazzi Gross, Köbi Gantenbein, Felix Giger, Josias Just e Lulo Tognola.
- Charly Bieler survegn il premi en appreziaziun da sia lavur engaschada sco schurnalist e fotograf e sco autur da cudeschs tematics e da litteratura da viadi.
- Corin Curschellas survegn in premi da renconuschientscha per sia activitad sco chantadura, cumponista, poetessa ed actura originala cun in grad d'enconuschientscha che tanscha lunsch sur ils cunfins svizzers or.
- Anna-Alice Dazzi Gross vegn undrada en renconuschientscha da sia lavur persvadenta en connex cun il svilup dal rumantsch grischun e da ses engaschi per la lingua e per la cultura rumantscha.
- Köbi Gantenbein vegn premià per sia activitad cumpetenta plain success sco schurnalist, organisatur d'exposiziuns ed intermediatur da cultura, en spezial en il sectur da l'architectura moderna en il Grischun.
- Felix Giger survegn in premi per sias grondas prestaziuns sco chauredactur dal dicziunari rumantsch grischun e per sias activitads multifaras a favur da la litteratura rumantscha.
- Josias Just vegn onurà per sias prestaziuns excellentas sco clarinettist solist e sco musicist da chombra sin plaun naziunal ed internaziunal.
- Lulo Tognola la finala vegn undrà per sias activitads artisticas, per ses stil incumparabel e per ses success durant sia carriera da blers onns sco graficher, caricaturist ed illustratur.
In premi da promoziun da mintgamai 20'000 francs survegnan: Arno Camenisch, scriptur, Ines Caviezel, sautunza, Milena Ehrensperger, fotografa, Ervin Janz, musicist, Sandro Keller, biofisicher, Ramona Proyer, artista figurativa, Manuela Tuena, chantadura, Roman Vital, cineast, e Christoph Waltle, percussiunist/chantadur.
Ils premis vegnan surdads en il rom d'ina festa che ha lieu venderdi, ils 19 da november 2010, a las 17.15 en la sala dal cussegl grond a Cuira.

Il Grischun approvescha la nova cunvegna davart la collavuraziun per manar il portal svizzer ch.ch
Il chantun Grischun approvescha la renovaziun da la cunvegna da dretg public davart la collavuraziun da la confederaziun e dals chantuns per manar il portal svizzer ch.ch durant ils onns 2011 fin 2014. Quai ha concludì la regenza grischuna.
Gia l'atun 2009, en in'audiziun a la confederaziun, aveva la regenza declerà da renovar la cunvegna. Tenor l'avis da la regenza gida la cunvegna a promover la collavuraziun, l'armonisaziun e la standardisaziun dal sectur dad e-government sin tut ils plauns statals. Il portal d'internet ch.ch ha l'intent da porscher a la populaziun ed a l'economia in access simpel a las prestaziuns da las autoritads federalas, chantunalas e communalas.
La nova cunvegna per manar il portal observa per gronda part las regulaziuns vertentas. Ils custs totals e lur repartiziun èn restads tals e quals. Ils chantuns surpiglian sco fin ussa la mesadad dals custs da gestiun dad 1.2 milliuns francs. Il chantun Grischun sa participescha al portal svizzer cun ina contribuziun annuala maximala da 14'800 francs.

La regenza s'exprima davart la 6. revisiun da la AI
La regenza grischuna beneventa da princip il segund pachet da mesiras che la confederaziun propona per la 6. revisiun da la AI. Uschenavant che las mesiras rinforzan il focus sin l'integraziun, las considerescha ella sco cuntinuaziun consequenta da las adattaziuns legalas fatgas fin ussa. Dubis exprima la regenza dentant davart las mesiras da spargn voluminusas planisadas. Quai menziunescha la regenza en sia resposta da consultaziun a la confederaziun.
En spezial en il sectur dals impediments psichics possia la prevenziun vegnir meglierada tenor l'avis da la regenza, tras quai che l'uffizi da la AI contacteschia a temp ed en moda nuncumplitgada la patruna u il patrun. Er la flexibilisaziun da la durada da las mesiras portia meglieraziuns considerablas en quest sectur. Sustegnidas vegnan er las mesiras previsas che han l'intent da cumbatter meglier ils engions, da reducir ils debits da l'assicuranza e da garantir a lunga vista l'equiliber finanzial.
Tenor l'avis da la regenza saja la sanaziun dals gronds debits da la AI en l'interess da tuts. Il cussegl federal suttamettia ussa dentant in project che saja caracterisà da reducziuns da prestaziuns. Quai valia cunzunt per l'adattaziun dal sistem da rentas, per la reducziun da las rentas per uffants e per la reducziun da l'indemnisaziun dals custs da viadi. La regenza è da princip conscienta dal basegn d'agir existent. En vista al fatg ch'il dumber da rentas novas sa reducescha fermamain dapi onns, dubitescha ella dentant la necessitad da mesiras da spargn uschè voluminusas.

Sceptica envers la revisiun da l'ordinaziun davart las bancas da gieu
La regenza grischuna è sceptica envers la revisiun parziala da l'ordinaziun davart las bancas da gieu ch'è planisada da la confederaziun. Il project regla tranter auter l'introducziun da sistems da surveglianza tecnics per gieus a la maisa en tut las bancas da gieu. Er las disposiziuns per garantir la buna reputaziun e la gestiun irreproschabla da las bancas da gieu èn vegnidas repassadas.
En il chantun Grischun èn actualmain averts dus casinos cun concessiuns B. Sco che la regenza menziunescha en sia audiziun a la confederaziun, sajan quests casinos – en reguard turistic – in enritgiment prezius per las regiuns turisticas respectivas. La buna reputaziun da las bancas da gieu, la garanzia d'in manaschi da gieus ordinà ed er la rentabilitad aspirada stoppian vegnir prendidas en mira cun tut ils meds. La regenza dubitescha dentant che questas finamiras possian vegnir cuntanschidas tras la revisiun qua avant maun. Tenor ella èn las investiziuns supplementaras per la surveglianza sproporziunadas ed exageradas. Ils mecanissems da surveglianza existents bastian tenor l'avis da la regenza.
Pervia da las cundiziuns existentas e pervia da la fixaziun vertenta da la taglia hajan ils casinos cun concessiuns B ultra da quai gia oz problems da cuntanscher ina rentabilitad commensurada. En il rom da la proxima revisiun supplitgescha la regenza perquai d'ina vart la confederaziun da reducir las tariffas da taglia per casinos cun concessiuns B, per ch'in manaschi rentabel daventia pussaivel. Da l'autra vart duai la confederaziun desister da las investiziuns obligatoricas planisadas en il sectur da la surveglianza.

Da vischnancas e da regiuns

• Brusio: Per il circul da Brusio ha la regenza designà in president cirquital extraordinari. Per liquidar las incumbensas betg giudizialas dal circul da Brusio durant la perioda dal 1. d'avust 2010 fin ils 31 da december 2014 vegnan designads Piero Pola sco president cirquital e Marcandrea Paganini sco ses suppleant. Sin basa da la situaziun actuala èn ils dus anteriurs titulars da quests uffizis sa declerads pronts da surpigliar las incumbensas administrativas per il rest da la perioda d'uffizi currenta. Per garantir las funcziuns giudizialas dal circul da Brusio ha la dretgira chantunala gia fixà las cumpetenzas. A chaschun da las elecziuns cirquitalas dals 13 da zercladur e dals 4 da fanadur 2010 avevan ils candidats elegids refusà l'elecziun.

Contribuziuns chantunalas a differentas instituziuns 

• Associaziun d'alzheimer dal Grischun: L'incarica da prestaziun dal chantun Grischun a l'associaziun d'alzheimer dal Grischun vegn acceptada. Per ademplir las incumbensas surdadas dal chantun survegn l'associaziun d'alzheimer dal Grischun ina contribuziun pauschala annuala da 150'000 francs.
• Fundaziun ARGO: A la fundaziun ARGO vegn garantida ina contribuziun da maximalmain 65'520 francs per las lavurs da transfurmaziun per sanar l'indriz da ventilaziun per la vapur da colur en il lavuratori a Cuira.
• Tgira da monuments: Per las lavurs da conservaziun vi da la ruina da Neu-Aspermont a Jenins vegn pajada ina contribuziun da maximalmain 195'000 francs.

 
Persunal

• Erich Büsser, domicilià a Sargans, è vegnì elegì da la regenza sco manader da l'uffizi d'energia e da traffic. L'electroinschigner diplomà SPF surpiglia a partir dal 1. da december 2010 la plazza dad Ernst Bachmann ch'è mort ils 18 da fanadur 2010. Büsser, ch'è naschì l'onn 1960, lavura dapi l'onn 2008 sco manader da project tar l'uffizi per ambient ed energia dal chantun Son Gagl. Avant ha el tranter auter lavurà ils onns 1994 fin 2000 tar la Viafier retica sco manader da l'engineering ed ils onns 2001 fin 2008 sco mainagestiun da las ovras electricas ed idraulicas da la vischnanca da Mels.

Gremi: regenza
Funtauna: rg chanzlia chantunala dal Grischun