Venderdi, ils 24 da settember 2010, ha lieu sin l'areal dal Kantengut da la scola auta da pedagogia dal Grischun (SAPGR) a Cuira l'inauguraziun uffiziala da l'engrondiment e da l'adattaziun dal lieu da scolaziun. Suenter in temp da construcziun da circa in onn e mez ha l'engrondiment pudì vegnir surdà entaifer il termin fixà a la SAPGR. Sonda, ils 25 da settember 2010, ha lieu da las 10.00 fin las 16.00 in di da las portas avertas che dat invistas da las differentas partiziuns da la SAPGR.

La SAPGR ha surpiglià l'onn 2003 las localitads da l'anteriura scola da dunnas sin l'areal dal Kantengut a la Scalärastrasse a Cuira. Dapi quella giada porscha la SAPGR sco suletta instituziun dal chantun Grischun scolaziuns per persunas d'instrucziun. Actualmain frequentan 278 studentas e students la scola auta.

Per ademplir sias incumbensas dovra la SAPGR dus auditoris, en ils quals in'annada da scolaziun po vegnir instruida mintgamai communablamain. Ils novs auditoris èn situads directamain sper ils locals da gruppa. Quai permetta da realisar las furmas d'instrucziun giavischadas en gruppas grondas e pitschnas. Ultra da quai è vegnida realisada ina nova mediateca, che sa lascha cuntanscher facilmain e che porscha avunda plazzas per lavurar. La nova mediateca è in lieu da scolaziun central, nua che las studentas ed ils students survegnan in access direct a las medias ed a la litteratura, uschia ch'ellas ed els pon lavurar independentamain.

Il project da l'architect Pablo Horváth, Cuira, persvada tant areguard sia concepziun sco er areguard sia funcziunalitad ed areguard sia economia. Las structuras existentas èn vegnidas resguardadas ed il program da spazi è vegnì extendì moderadamain per 1100 meters quadrat. Tras la fatschada en betun natiral fa la materialisaziun in connex cun il stabiliment existent. L'access dal nov tract cun ils auditoris e cun la mediateca è vegnì construì sin il plaun dal foyer existent, e quai da la vart, per lung da l'aula odierna. Suenter in temp da construcziun da circa in onn e mez ha l'engrondiment, ch'è certifitgà tenor Minergie, pudì vegnir surdà entaifer il termin fixà a la SAPGR. Ils custs maximals previs da 5.8 milliuns francs han pudì vegnir observads.

Cun questas mesiras architectonicas po la SAPGR optimar cleramain la furmaziun da basa da sias studentas e da ses students, ed a medem temp po ella realisar las furmaziuns supplementaras da las persunas d'instrucziun en ina dimensiun pli gronda. L'edifizi annex previs correspunda als basegns actuals d'ina instrucziun en ina scola auta e permetta a la scola da realisar en moda effizienta sia incarica legala da prestaziun. L'edifizi d'engrondiment vegn a rinforzar la SAPGR, ch'è la suletta instituziun trilingua sin il champ da furmaziun naziunal, e vegn a crear uschia la basa per ina instrucziun da scola primara en tuttas trais linguas chantunalas er en il futur.


Infurmaziuns:
Markus Dünner, architect chantunal, uffizi da construcziun auta, tel. 081 257 36 31


Gremi: uffizi da construcziun auta dal Grischun
Funtauna: rg uffizi da construcziun auta dal Grischun