Il chantun Grischun serra la chasa da dimora per requirentas e per requirents d'asil "Bergwald" si Planeiras per la fin da settember 2010. L'instituziun vegn serrada anticipadamain per motivs da custs e perquai che la nova avertura d'in center da transit a Cazas daventa pussaivla proximamain sco er grazia al regress da requirentas e da requirents d'asil novarrivads.

Il tard atun 2006 ha il chantun Grischun prendì en locaziun l'immobiglia "Bergwald" en la vischnanca da Vaz sco chasa da dimora per requirentas e per requirents d'asil, e quai per ina durada da tschintg onns. L'immobiglia ha plazza per circa 70 requirentas e requirents d'asil ed è vegnida duvrada sco center da transit. En ils centers da transit vegnan collocadas persunas che spetgan il resultat da lur procedura d'asil e che pon er surpigliar in'activitad da gudogn en il fratemp.

Sin giavisch ed en enclegientscha cun il proprietari da l'immobiglia è il contract vegnì schlià in onn avant la scadenza da la locaziun ch'era vegnida fixada contractualmain per ils 31 da mars 2011. Pervia da l'assegnaziun – ch'è actualmain bassa – da novas requirentas e da novs requirents d'asil al chantun Grischun ed en vista a la proxima avertura dal center da transit "Rheinkrone" a Cazas vegnan transferidas las requirentas ed ils requirents d'asil ch'èn collocads en l'immobiglia "Bergwald" en autras chasas da dimora, uschia ch'il center da transit "Bergwald" po vegnir mess or da funcziun vers la fin da settember 2010.

Avant l'avertura dal center da transit, l'atun 2007, eran la populaziun locala sco er circuls turistics sa fatgs gronds quitads davart las consequenzas negativas da l'instituziun per il turissem sco er per il territori da recreaziun dals conturns. Grazia ad ina gestiun rigurusa da la chasa da dimora èn questas temas per fortuna stadas vanas. Las requirentas ed ils requirents d'asil ch'eran preschents èn vegnids acceptads bain er da la populaziun dal vitg. Plinavant han numerusas requirentas e numerus requirents d'asil pudì vegnir intermediads sco forzas da lavur en interpresas localas. Uschia han ellas ed els facilità al mastergn local da tschertgar persunal auxiliar.


Infurmaziuns:
- Heinz Brand, schef da l'uffizi da fatgs da polizia e da dretg civil dal Grischun, tel. 081 257 25 21
- Beda Egger, manader da la partiziun "asil ed execuziun da mesiras", tel. 081 257 25 35


Gremi: uffizi da fatgs da polizia e da dretg civil
Funtauna: rg uffizi da fatgs da polizia e da dretg civil