La cumissiun per economia e taxas dal cussegl grond ha deliberà las fatschentas che pertutgan ses champ d'incumbensas per la sessiun parlamentara d'october 2010. La cumissiun approva unanimamain la construcziun d'ina nova stalla da muvel grond al Plantahof sco er la proposta da la regenza per ina revisiun parziala da la lescha chantunala da taglia.

La cumissiun per economia e taxas (CET) ha stuì predeliberar gist duas fatschentas per la sessiun d'october 2010 dal cussegl grond. Per l'ina la missiva da la regenza davart la construcziun d'ina nova stalla da muvel grond al center da furmaziun e cussegliaziun agricula Plantahof e per l'autra la missiva davart la revisiun parziala da la lescha da taglia per il chantun Grischun.
 
En ina emprima sesida – sut il presidi da deputà Heinz Dudli ed en preschientscha da cusseglier guvernativ Stefan Engler – ha la cumissiun decidì unanimamain da proponer al cussegl grond d'approvar la construcziun d'ina nova stalla da muvel grond al Plantahof. Durant la sesida ha la cumissiun pudì s'infurmar detagliadamain al lieu davart il project ed ha pudì sa persvader che la construcziun d'ina stalla da muvel grond è fitg impurtanta ed er necessaria per l'avegnir dal Plantahof. Las stallas existentas èn en in fitg nausch stadi architectonic e na correspundan betg pli al standard d'ina agricultura moderna. In plan general ch'il chantun ha incumbensà prevesa ussa in proceder en etappas, tenor il qual vegnan construids l'emprim las novas stallas, ina mulschera, locals da scolaziun, in'arena, claus per ils vadels sco er in deposit da strom e da pavel. Avant ch'ins possia dentant cumenzar a construir, sto il cussegl grond dar liber il credit da set milliuns francs. En ina segunda etappa che n'è dentant betg chaussa da questa missiva, stuessan anc vegnir agiuntads in lavuratori ed abitaziuns per las emploiadas e per ils emploiads che s'occupan dals animals. Er questa etappa stuess puspè vegnir preschentada al parlament per l'approvaziun.

En sia segunda sesida ha la cumissiun – en preschientscha da cusseglier guvernativ Martin Schmid – tractà la missiva davart la revisiun parziala da la lescha da taglia. Suenter l'ultima revisiun parziala da la lescha da taglia ch'è vegnida deliberada pir il zercladur 2009 dal cussegl grond daventa necessaria ina nova revisiun, perquai ch'igl ha dà midadas en il dretg fiscal federal armonisà. Ultra da quai duai l'incassament da la taglia a la funtauna vegnir transferì da las vischnancas al chantun, sco che la nova gulivaziun da finanzas (NGF) grischuna – ch'è vegnida refusada dal pievel ils 7 da mars 2010 – avess previs. En quest punct era la NGF incontestada. Dacurt ha il tribunal federal prendì duas decisiuns che pretendan d'adattar il dretg fiscal chantunal per al pudair mantegnair confurm a la constituziun. La cumissiun è sa confruntada detagliadamain cun il project ed è arrivada unanimamain a la conclusiun da recumandar al cussegl grond d'acceptar il project.


Infurmaziuns:
President da la cumissiun Heinz Dudli, tel. 079 248 46 47


Gremi: cumissiun per economia e taxas
Funtauna: rg cumissiun per economia e taxas