L'administraziun chantunala da taglia porscha in nov servetsch d'internet. A partir d'immediat pon dumondas da suspender il termin da pajament u da pajar in quint fiscal en ratas vegnir inoltradas directamain sur in formular d'internet.

En cas motivads – sch'igl existan relaziuns spezialas – prolunghescha l'administraziun chantunala da taglia il termin da pajament u permetta pajaments en ratas per taglias chantunalas u federalas. Fin ussa stueva vegnir inoltrada ina dumonda en scrit per quai. Da nov èsi pussaivel d'inoltrar ina tala dumonda directamain per internet sur la pagina da l'administraziun chantunala da taglia (www.stv.gr.ch => Dienstleistungen => Online-Gesuche). Il formular sto vegnir emplenì cumplettamain e mintga dumonda sto cuntegnair ina motivaziun detagliada. I na dat nagin dretg da suspender il pajament u d'al pajar en ratas. Cun valitar la dumonda examinescha l'administraziun da taglia, sch'igl existan relaziuns spezialas e tgeninas che quellas èn. En la procedura da decisiun resguarda ella tant il cumportament da pajament vertent dal pajataglia sco er la ristga d'ina eventuala perdita.

Sch'i vegn approvà da suspender il pajament u d'al pajar en ratas, vegnan debitads tschains da retard; quests tschains importan actualmain 4% per las taglias chantunalas e 3.5% per la taglia federala directa. Suenter l'introducziun d'ina scussiun na po betg pli vegnir entrà sin dumondas da facilitaziun da pajament. Per las taglias communalas decida la vischnanca, sche ed en tge dimensiun ch'i vegnan concedidas facilitaziuns da pajament. Perquai sto in'eventuala dumonda vegnir drizzada directamain a la vischnanca.


Infurmaziuns:
Giuliano Racioppi, manader da la partiziun "contabilitad", administraziun da taglia, tel. 081 257 34 62


Gremi: administraziun da taglia
Funtauna: rg administraziun da taglia