L'uffizi per la segirezza da victualias e per la sanadad d'animals lantscha – en collavuraziun cun la polizia chantunala dal Grischun – il project "Animal Grischun". La finamira è quella d'optimar – tras scolaziuns – la collavuraziun en connex cun las incumbensas da la protecziun dals animals.

Il post spezialisà per la protecziun dals animals ch'è vegnì stgaffì da nov tar l'uffizi per la segirezza da victualias e per la sanadad d'animals ha cumenzà sia lavur il fanadur 2010. Tras quest post èn vegnidas creadas las structuras necessarias per garantir in'execuziun adequata da la legislaziun davart la protecziun dals animals.

En il sectur da la protecziun dals animals è involvida – ultra da l'uffizi per la segirezza da victualias e per la sanadad d'animals – savens er la polizia chantunala perquai ch'ella retschaiva las annunzias da la populaziun u gida l'uffizi ad exequir la lescha. La polizia e l'uffizi èn pia dependents d'ina collavuraziun effizienta e structurada. En il rom dal project "Animal Grischun" vegnan scolads ils polizists chantunals dals posts da polizia regiunals per lur incumbensas en il sectur da la protecziun dals animals. Quai duai gidar ad optimar l'elavuraziun dals cas che pertutgan la protecziun dals animals.

Per exequir la legislaziun davart la protecziun dals animals sa basa il post spezialisà per la protecziun dals animals, betg mo sin la cooperaziun cun la polizia, mabain er sin ina collavuraziun cun ils veterinaris uffizials regiunals, cun il servetsch da controlla agricula dal Grischun, sin la cumissiun chantunala per experiments cun animals e sin la societad grischuna per la protecziun dals animals. Las incumbensas executivas cumpiglian tranter auter la controlla ch'i vegnian observadas las prescripziuns davart la protecziun dals animals en tratgas d'animals da niz e sin transports d'animals, ch'i vegnia survegliada la protecziun dals animals en stabiliments da maz, sin fieras e sin exposiziuns sco er ch'i vegnian fatgs scleriments davart ulteriuras mesiras che pertutgan la protecziun dals animals.


Infurmaziun per las medias:
Mesemna, ils 10 da november 2010 èn las collavuraturas ed ils collavuraturs da las medias interessads cordialmain envidads da prender invista da la tematica.
Scuntrada: Polizia chantunala grischuna, Ringstrasse 2, 7000 Cuira, a las 10.00.
Igl è necessari da s'annunziar ordavant tar l'uffizi per la segirezza da victualias e per la sanadad d'animals (tel. 081 257 24 15; e-mail: info@alt.gr.ch).


Infurmaziuns:
dr. Rolf Hanimann, veterinari chantunal, uffizi per la segirezza da victualias e per la sanadad d'animals, tel. 081 257 24 11 u 257 24 21


Gremi: Uffizi per la segirezza da victualias e per la sanadad d’animals dal Grischun
Funtauna: rg uffizi per la segirezza da victualias e per la sanadad d'animals dal Grischun