En ina brev a la federaziun da tetg "associaziun olimpica svizra" ha la regenza grischuna fatg manifestà ses interess da preparar ina candidatura per gieus olimpics d'enviern. Ultra da quai ha ella avert la consultaziun tar il sboz per ina nova lescha davart l'integraziun da persunas cun impediments. Dal rest ha ella concludì da reveder l'ordinaziun da chatscha e l'ordinaziun davart la tgira da la selvaschina. Questa revisiun permetta al chantun da prender en il futur mesiras supplementaras a favur da la selvaschina che sa chatta en situaziuns d'urgenza. La finala ha la regenza mess en vigur per il cumenzament da 2011 la segunda part da la revisiun da la lescha da taglia che pertutga la refurma da l'imposiziun da taglia sin interpresas II sco er formulà sia posiziun tar ils projects da consultaziun da la confederaziun.

Pretensiuns ad ina candidatura per ils gieus olimpics d'enviern
En ina brev a "l'associaziun olimpica svizra" conferma la regenza grischuna ch'ella è da princip interessada da promover ina candidatura per gieus olimpics d'enviern. Il chantun e differentas vischnancas questiunadas han ina tenuta positiva envers ina candidatura per gieus olimpics d'enviern.
La federaziun da tetg dal sport svizzer, l'associaziun olimpica svizra, ha envidà la fin d'avust quellas regiuns che avevan mussà ils onns passads lur interess per ina candidatura, da communitgar, sch'in tal exista anc adina. L'ulteriur proceder vul l'associaziun olimpica svizra determinar a chaschun d'ina dieta dal parlament da sport che ha lieu ils 19 da november. Sa basond sin questa definiziun vegnan ils chantuns ed ils lieus da sport d'enviern a far ulteriurs scleriments per sa pudair far in'opiniun pli detagliada.
En vista a l'infrastructura ch'è gia avant maun ed en vista al grad d'enconuschientscha dals lieus grischuns da sport d'enviern ha la regenza anc adina in grond interess per ina candidatura. Bainvegnì e resguardà sco in plus vegn il fatg da bandunar la tendenza da las ultimas surdadas cun returnar en ils lieus da sport d'enviern cun curtas vias d'access. La regenza sustegna er il fatg che l'associaziun olimpica svizra vul surpigliar l'incumbensa da coordinar e da manar il project avant ch'i vegnan elavurads dossiers regiunals da candidatura per gieus olimpics d'enviern en Svizra.

La nova lescha davart l'integraziun da persunas cun impediments va en consultaziun
L'integraziun professiunala e sociala da persunas cun impediments da vegnir reglada da nov en la lescha. La regenza grischuna ha deliberà per la consultaziun il sboz d'ina nova lescha davart l'integraziun da persunas cun impediments.
L'intent da questa lescha è l'integraziun sociala e professiunala da persunas creschidas cun impediments. Ella fixescha, co che las prestaziuns duain vegnir indemnisadas e co che la planisaziun da las purschidadas da las instituziuns per persunas cun impediments duain vegnir concepidas en il futur en il Grischun. Ella duai effectuar in'observaziun generala ed ina direcziun generala da las purschidas ambulantas, parzialmain staziunaras e staziunaras en il Grischun. La finamira è quella da pussibilitar a persunas cun impediments ina purschida che tegna quint da lur basegn d'assistenza. Il punct central da la nova sistematica è quel che la finanziaziun da tut las purschidas s'orientescha en il futur vi dal basegn individual d'assistenza e ch'ella vegn a sa basar sin pauschalas standardisadas. Uschia duai il sistem vertent da la finanziaziun che s'orientescha al deficit, che vegn applitgà da la confederaziun, vegnir substituì. Sco purschidas da l'integraziun sociala valan plazzas d'abitar protegidas, accumpagnaments d'abitar sco er purschidas d'integraziun e da cussegliaziun. En il sectur da l'integraziun professiunala appartegnan a la purschida plazzas da lavur protegidas, plazzas cun structuras dal di, accumpagnaments da lavur e plazzas da lavur d'integraziun.
Il nov project da lescha sa basa sin il concept per promover l'integraziun da persunas cun impediments ch'è vegnì deliberà da la regenza l'avrigl. Questas adattaziuns èn necessarias, perquai ch'ils chantuns han surpiglià da la confederaziun dapi l'onn 2008 – pervia da la nova concepziun da la gulivaziun da finanzas e da las incumbensas tranter la confederaziun ed ils chantuns (NGF) – la cumpetenza per finanziar las instituziuns per persunas cun impediments.
Ils documents da la consultaziun vegnan mess a disposiziun sin la pagina d'internet dal departament d'economia publica e fatgs socials sut www.dvs.gr.ch. La consultaziun fineschan ils 21 da schaner 2011.

Il chantun cumplettescha las mesiras per la selvaschina en situaziuns d'urgenza
Per la selvaschina en situaziuns d'urgenza extraordinarias po l'uffizi da chatscha e pestga prender ulteriuras mesiras en il futur. La regenza grischuna ha mess en vigur ina revisiun correspundenta da l'ordinaziun da chatscha e da l'ordinaziun davart la tgira da la selvaschina.
Da nov po l'uffizi da chatscha e pestga scumandar per exempel da penetrar en ils quartiers da la selvaschina u relaschar scumonds da charrar. Medemamain po el ordinar l'obligaziun da tegnair chauns a la tschinta e prender ulteriuras mesiras per proteger la selvaschina da distrurbis. Questas mesiras ston vegnir limitadas localmain e temporarmain. La finala po il chantun pajar en l'avegnir contribuziuns als custs dal pavel.
Gia l'onn passà – suenter il dir enviern 2008/2009 – aveva il chantun cumplettà ils concepts da tgira regiunals existents cun in chapitel che cuntegneva mesiras d'urgenza. Grazia ad acziuns coordinadas da la pavlada d'enviern, survegn uschia la selvaschina en situaziuns d'urgenza pussaivladads da distgargia ch'èn mintgamai accordadas als basegns respectivs. Sias schanzas da surviver s'augmentan.

La segunda part da la revisiun da la lescha da taglia entra en vigur il cumenzament da l'onn 2011
La regenza grischuna ha mess en vigur per il 1. da schaner 2011 la segunda part da la revisiun da la lescha chantunala da taglia ch'è vegnida concludida il fanadur 2009. Questa part pertutga la refurma da l'imposiziun da taglia sin interpresas II. En la taglia federala directa entra questa part medemamain en vigur per il 1. da schaner 2011. In'unifurmaziun tranter la confederaziun ed il chantun è pia garantida.
Essenzialmain sa tracti dal fatg che la liquidaziun d'ina societad da persunas vegn suttamessa en moda privilegiada a la taglia, sche l'activitad da gudogn independenta vegn smessa suenter avair cumplenì il 55avel onn da vegliadetgna u pervia da l'incapacitad da cuntinuar cun questa activitad en consequenza d'ina invaliditad. Ultra da quai vegnan las taglias suspendidas en cas da l'affittaziun d'ina interpresa, en cas dal transferiment d'ina immobiglia en facultad privata ed en cas da partiziuns d'ierta.
Il cussegl grond aveva concludì la revisiun parziala da la lescha da taglia per il chantun Grischun ils 18 da zercladur 2009. La regenza aveva mess en vigur l'emprima part dal project per il 1. da schaner 2010. Quella giada eran vegnidas augmentadas tranter auter las deducziuns per uffants e la taglia sin il gudogn da persunas giuridicas era vegnida reducida da 7% a 5.5%.

La revisiun da la lescha federala davart ils cartels ed autras restricziuns da la concurrenza vegn beneventada
La regenza grischuna sustegna la revisiun previsa da la lescha federala davart ils cartels ed autras restricziuns da la concurrenza. Cun questa revisiun vul la confederaziun realisar meglieraziuns structuralas ed instituziunalas. La refurma prevesa da crear in'autoritad independenta da concurrenza che maina las inquisiziuns e che fa la proposta. Sia proposta vegn drizzada ad in tribunal federal da concurrenza d'emprima instanza che sto vegnir creà da nov.
En vista a la cumplexitad da las proceduras dal dretg da concurrenza ed en vista a las sancziuns ch'èn per part considerablas e che cumpiglian per part summas da milliuns pari raschunaivel e necessari a la regenza che decisiuns dal dretg da concurrenza possian vegnir tratgas respectivamain examinadas d'ina instanza giudiziala independenta en ina procedura irreproschabla dal puntg da vista dal stadi da dretg. La regenza approva perquai las adattaziuns organisatoricas e proceduralas previsas. Il medem mument renviescha ella als custs ch'èn colliads cun quai che ston esser en ina relaziun sauna cun il niz supplementar.

La regenza sustegna l'augment previs dal tschains da retard
Da princip pleda la regenza grischuna a favur da l'augment dal tschains legal da retard da 5 a 10 pertschient, sco ch'el vegn previs da la confederaziun per il traffic commerzial. La finamira è quella da motivar las debituras ed ils debiturs da pajar svelt lur obligaziuns e da far frunt al retard da pajament che chaschuna in donn considerabel a l'economia publica.

Da vischnancas e da regiuns

• Vaz e Churwalden: Las revisiuns parzialas da las planisaziuns localas "Via da panorama" da la vischnanca da Vaz dals 29 da november 2009 sco er da la vischnanca da Churwalden dals 13 da zercladur 2010 vegnan approvadas.
• Bregaglia e Segl: La regenza approva ils contracts tranter il chantun Grischun e la vischnanca da Bregaglia sco er la vischnanca da Segl per laschar surpigliar la polizia chantunala dal Grischun incumbensas da la polizia communala.

Contribuziuns chantunalas a differentas instituziuns 

• Fundaziun Hosang Plankis: A la fundaziun Hosang Plankis vegn garantida ina contribuziun da maximalmain 42'615 francs vi dals custs per metter ina cuvrida fina en ils secturs da l'entrada, da l'access e dals parcadis da l'instituziun Plankis a Cuira.

 
Gremi: regenza
Funtauna: rg chanzlia chantunala dal Grischun