Ensemen cun ils presidents regiunals d'urari e cun las interpresas da transport ha la procedura d'urari pudì vegnir terminada cun success. La midada da l'urari ils 12 da december 2010 meglierescha levamain la purschida da la viafier e dals bus en tut il chantun. La prioritad han l'amplificaziun da la purschida da trens-intercity tranter Turitg e Cuira sco er la meglieraziun da las colliaziuns entaifer il Grischun. Las tariffas vegnan augmentadas per l'emprima giada dapi trais onns per 5,9 pertschient en media. Bigliets singuls ed abunaments da lingia daventan mo per 2,4 pertschient pli chars.

En il rom da la procedura chantunala d'urari, che vegn realisada mintga onn da l'uffizi d'energia e da traffic en stretga collavuraziun cun las interpresas da transport e cun ils 10 presidents regiunals d'urari, èn vegnidas inoltradas l'onn 2010 passa 200 dumondas. 129 da quellas (62%) han pudì vegnir ademplidas per part u dal tuttafatg. Per motivs finanzials, pervia da las premissas d'infrastructura u pervia d'interess che sa concurrenzeschan cun ils interess d'autras viagiaturas e d'auters viagiaturs n'han (anc) betg pudì vegnir realisads ils ulteriurs giavischs. Las novaziuns las pli impurtantas èn menziunadas curtamain qua sutvart:

Ulteriurs trens-intercity en il tact da mesa ura tar las Viafiers federalas (VFF)
En il traffic a distanza da las VFF curseschan ulteriurs trens-intercity en il tact da mesa ura tranter Turitg e Landquart/Cuira: Turitg, staziun principala, partenza a las 7.07 mintga di durant la stagiun da stad, a las 8.07 ed a las 10.07 mintga di, sco er las sondas a las 12.07. Partenza da Cuira las sondas a las 14.39, mintga di a las 16.39 ed a las 18.39 sco er durant la stagiun da stad mintga di a las 19.39. Quest pass gida a realisar plaun plaunet la finamira lontana d'introducir trens-intercity en il tact da mesa ura tranter Turitg ed il Grischun. Ils trens curseschan senza fermada tranter Turitg e Landquart ed han minibars e per part er vaguns-restaurant.
Grazia ad in tren-intercity supplementar che parta da Cuira a las 21.09 vegn il tact da mesa ura prolungà per in'ura las dumengias. Pertutgant il traffic regiunal da las VFF na datti naginas midadas.
 
Meglieraziuns tar la Viafier retica (VR)
La Viafier retica porscha trens da colliaziun sin ils trens-intercity che circuleschan supplementarmain en il tact da mesa ura:
mintga di partenza da Landquart a las 9.20 resp. a las 11.20, arriv a San Murezzan a las 11.19 resp. a las 13.19
las sondas partenza da Landquart a las 13.20, arriv a San Murezzan a las 15.19 sco er partenza da San Murezzan a las 12.26, arriv a Landquart a las 14.37
mintga di partenza da San Murezzan a las 14.35 resp. a las 16.35, arriv a Landquart a las 16.37 resp. a las 18.37
la stad mintga di partenza da San Murezzan a las 17.35, arriv a Landquart a las 19.37.
Il tren "ALLEGRA" è il nov timun da la VR. Dapi il matg 2010 curseschan ils emprims trens ad autotracziun sin la viafier dal Bernina. Fin il mars 2011 vegnan tut ils 15 trens ad autotracziun, che funcziunan sin dus sistems d'electricitad, duvrads en il manaschi regular. Els circuleschan alura er sin las lingias Cuira – Arosa e Landquart – Tavau – Filisur.

Numerusas meglieraziuns pli pitschnas da la purschida e novas lingias da l'AutoDaPosta Grischun
Sin las lingias Cuira – Laax e Cuira – Planeiras porscha l'auto da posta numerusas colliaziuns supplementaras che suondan las novas colliaziuns d'intercity da las VFF, l'avantmezdi en direcziun da Laax e da Planeiras ed il suentermezdi en direcziun da Cuira.
La nova lingia d'autos da posta Brusio – Selvaplana colliescha las fracziuns da Garbella e da Selvaplana ch'èn situadas al nord da Brusio cun Brusio Paese. Ils dis ch'i n'è nagina scola stat a disposiziun a las viagiaturas ed als viagiaturs in PubliCar. Surrein – Sumvitg – Cumpadials sco er Tumein – Favugn èn novas lingias d'auto da posta che servan a transportar scolaras e scolars. Tranter las pendicularas da Laax e da Laax Murschetg datti l'enviern ina nova lingia locala da bus.

Las midadas las pli impurtantas en connex cun il bus da la citad da Cuira (SBC) resp. il bus Engiadina (EB)
La lingia 2 dal bus da la citad da Cuira, Kleinwaldegg – Obere Au survegn al Lürlibad in nov cirquit per obtegnair in meglier access al Böschengut ed a l'ospital Fontana: La Bondastrasse vegn furnida mo pli amunt. Sur la nova Böschenstrasse cun las novas fermadas Böschenstrasse e Fondeiweg pon ins cuntanscher l'ospital Fontana e suenter puspè la Lürlibadstrasse en direcziun da la staziun. La fermada Brändligasse survegn il num Kleinwaldegg.
Per ils utschels da la notg metta la SBC a disposiziun las notgs da venderdi sin sonda e da sonda sin dumengia il "Prättigauer Nachtbus" Cuira – Landquart – Tavau, partenza da Cuira a las 0.15, cun viadi da return a als 2.10 davent da Tavau Plaz sco er a las 0.33 davent da Claustra a Cuira, a Claustra sco colliaziun dal bus da Tavau cun partenza da Tavau Plaz a las 0.03.
Il bus da notg quotidian en Engiadina cursescha – sin fundament da la dumonda allegraivla – da nov tenor in urari fix e betg pli sin clom.
 
La pendiculara Razén/Veulden (LRF) meglierescha sias colliaziuns
La LRF parta da nov 5 minutas pli baud, mintgamai a las minutas 10 e 40. Uschia vegn la colliaziun cun il bus meglierada, e las viagiaturas ed ils viagiaturs han temp avunda per arrivar anc a temp a pè a la staziun da Razén.


Infurmaziuns:
- Werner Glünkin, manader da la partiziun per il traffic public, uffizi d'energia e da traffic, tel. 081 257 36 17, werner.gluenkin@aev.gr.ch  
- Peter Sprecher, manader da project, partiziun per il traffic public, uffizi d'energia e da traffic, tel. 081 257 36 19, peter.sprecher@aev.gr.ch  


Gremi: uffizi d'energia e da traffic
Funtauna: rg uffizi d'energia e da traffic