Cun "Viver en il Grischun, tom II" è ussa vegnì cumplettà il med d'instrucziun per uman ed ambient per la 4. – 6. classa dal chantun Grischun. Il med d'instrucziun stat a disposiziun en rumantsch, en tudestg ed en talian e tracta la geografia e l'istorgia dal chantun Grischun sco er temas socioculturals.

Per l'instrucziun dad uman ed ambient stat ussa pia a disposiziun sin il stgalim mesaun da la scola primara in med d'instrucziun cumplet per temas istorics, geografics e socioculturals. Cun numerus maletgs, cun diversas illustraziuns e cun texts bain enclegentaivels vegnan las scolaras ed ils scolars intimads tras quests dus toms da sfegliar e da leger, da far dumondas e da perscrutar. A las persunas d'instrucziun stattan a disposiziun materialias variadas che faciliteschan la preparaziun da lur instrucziun.

Collavuraziun interchantunala
Il med d'instrucziun sa basa sin in concept da la centrala interchantunala per meds d'instrucziun (CIMI). Pervia da quai ha "Viver en il Grischun" tschertas sumeglientschas cun ils novs meds d'instrucziun correspundents per uman ed ambient en auters chantuns. Il tratg cuminaivel en tut ils chantuns è quel ch'ils cuntegns èn repartids sin in cudesch per scolaras e per scolars, sin ina DVD cun fegls da lavur, sin datotecas dad audio, da film e da maletgs, sin datotecas da texts cumplementars e sin in commentari per las persunas d'instrucziun.
Il giavisch central dals manaders grischuns dal project (Fredy Tischhauser per il tom I, Domenic Melcher per il tom II) è sta quel da prender il mund da viver dals uffants e dals giuvenils sco punct da partenza per tractar differents temas. Uschia chattan ils uffants ed ils giuvenils – sin basa da lur enconuschientschas e da lur experientschas – plitgunsch access a chaussas novas. Ultra da las auturas e dals auturs principals han differentas persunas d'instrucziun da tut las regiuns dal Grischun gidà a cuntanscher quai cun lur contribuziuns.

Temas geografics, istorics e socioculturals
En il tom 1 dal med d'instrucziun vegnan tractads temas e secturs d'emprender or da l'istorgia ed or da la geografia dal Grischun. En il tom 2 vegnan vitiers da nov cuntegns dal sectur social. Tractads vegnan la mobilitad u ils ciclus dal provediment e da la dismessa, ed ils uffants s'occupan er da dumondas davart la convivenza a chasa, en classa ed en il stadi. En quest connex vegni – partind dal preschent – savens guardà en il passà, ed i vegnan er tschentadas dumondas davart svilups futurs. Ulteriurs chapitels tractan il "lavurar" ed il "abitar e construir". Terminà vegn il tom 2 cun in sguard sin in pèr aspects da la geografia svizra.

Parts dal med d'instrucziun, linguas
Il cudesch per scolaras e per scolars è cumparì per rumantsch, per talian e per tudestg. Ils dus toms dal cudesch per scolaras e per scolars en il format A4 vegnan consegnads sco in artitgel. Il commentari per las persunas d'instrucziun stat a disposiziun en furma stampada, dentant mo per tudestg. Las DVDs ch'èn integradas en il commentari cumpiglian tut ils fegls da lavur en tut las trais linguas chantunalas. Intgins texts, documents sonors e tschertas sequenzas da films cumpletteschan la purschida ed èn avant maun – sco documents originals ed istorics – mo en ina u en duas linguas.


Infurmaziuns:
Josy Marie Künzler, manadra da la secziun per ils meds d'instrucziun, uffizi per la scola populara ed il sport, tel. 081 257 22 61


Gremi: uffizi per la scola populara ed il sport
Funtauna: rg uffizi per la scola populara ed il sport