La regenza grischuna ha elegì ils commembers dal cussegl da la banca chantunala grischuna (BCG) per las periodas d'uffizi che cumenzan il 1. d'avrigl 2011. Sco president dal cussegl da banca è vegnì confermà il president vertent Hans Hatz.

Tenor la revisiun da la lescha davart la banca chantunala grischuna è la regenza cumpetenta per eleger il cussegl da banca. Sco president da la BCG per la perioda fin la fin da mars 2014 ha la regenza elegì il president vertent Hans Hatz. Sco vicepresident da la banca vegn medemamain elegì il vicepresident vertent Peter Wettstein, e quai per la perioda fin la fin da mars 2015.

Sco commembers dal cussegl da banca ha la regenza confermà ils cussegliers da banca vertents, Franco Quinter (fin la fin da mars 2015), Fabrizio Keller (fin la fin da mars 2014), Not Carl (fin la fin da mars 2013) sco er Jon Peider Lemm (fin la fin da mars 2013).

Perquai ch'il cussegl grond aveva concludì l'onn 2008 da reducir il cussegl da banca da nov a set commembras e commembers, ha la regenza stuì eleger totalmain sis commembras e commembers. Gia pli baud è vegnì elegì Christian Thöny sco commember dal cussegl da banca per ina perioda d'uffizi fin la fin da mars 2013. Dal cussegl da banca sortan Carlo Portner ed Erwin Roffler.

Tras l'elecziun dals commembers dal cussegl da banca vertents po vegnir garantida la cuntinuitad, malgrà la sminuziun dal gremi. Las disposiziuns transitoricas ch'èn cuntegnidas en la revisiun da la lescha davart la banca chantunala grischuna, entrada en vigur il 1. d'avrigl 2009, prescrivan che las periodas d'uffizi che cumenzan l'avrigl 2011 duran per mintgamai duas commembras e dus commembers dal cussegl da banca mintgamai dus, trais e quatter onns.


Infurmaziuns:
cusseglier guvernativ dr. Martin Schmid, schef dal departament da finanzas e vischnancas, tel. 081 257 32 01 (cuntanschibel fin a las 18.30)


Gremi: regenza
Funtauna: rg chanzlia chantunala dal Grischun