En il chantun Grischun duai vegnir introducì il model armonisà da contabilitad MAC2 per l'onn da preventiv 2013. Quai è l'intenziun da la regenza grischuna che ha lantschà la consultaziun davart quest project. Ultra da quai ha la regenza formulà sias respostas tar projects da consultaziun da la confederaziun.

La consultaziun per introducir il model armonisà da contabilitad MAC2 è lantschada
Per l'onn da preventiv 2013 duai il chantun Grischun introducir il model armonisà da contabilitad MAC2. La regenza grischuna ha deliberà il sboz per ina revisiun totala da la lescha chantunala davart las finanzas e davart la surveglianza da las finanzas per la consultaziun.
A partir da l'onn 1986 han las vischnancas ed a partir da l'onn 1988 il chantun Grischun introducì successivamain il model armonisà da contabilitad (MAC1) per lur rendaquints. Las pretensiuns envers la contabilitad publica èn sa sviluppadas en il fratemp. La conferenza dals directurs chantunals da finanzas (CDF) ha deliberà il schaner 2008 il nov manual MAC2. Quest manual cuntegna en tut 20 recumandaziuns tecnicas che represchentan ils standards minimals che duain vegnir ademplids da tut las communitads publicas. La CDF recumonda als chantuns ed a las vischnancas da realisar il MAC2 uschè svelt sco pussaivel, il pli tard entaifer 10 onns.
L'introducziun dal MAC2 porta en differents secturs novs elements per il rendaquint. Tranter auter vegn amplifitgada l'agiunta al quint annual cun in quint da cash flow, cun ina glista da las participaziuns sco er cun ina cumprova da l'agen chapital. Medemamain daventi obligatoric da far ina contabilitad da la facultad investida. Novaziuns resultan er d'ina cumprova dal gudogn e da la perdita da plirs stgalims, d'in nov plan dals contos armonisà, da la valitaziun da la facultad da finanzas e da la facultad administrativa sco er da las amortisaziuns. Il MAC2 ha en emprima lingia l'intenziun da cuntanscher dapli transparenza davart la situaziun effectiva da la facultad, da las finanzas e da la rendita. A medem temp vegnan adattadas las metodas da rendaquint dal maun public a quellas da l'economia privata.
Il sboz qua avant maun sa basa sin il model d'ina lescha da finanzas da la CDF tenor il MAC2. Las novas disposiziuns duain entrar en vigur per il 1. d'avrigl 2012, per ch'il chantun possia realisar il MAC2 per l'onn da preventiv 2013. Per quest termin duai er esser avant maun la basa per introducir il MAC2 tar las vischnancas, tar las vischnancas burgaisas, tar las corporaziuns regiunalas e tar las corporaziuns da vischnancas. Igl è previs da rimnar experientschas cun vischnancas da model e d'adattar ils rendaquints da tut las vischnancas grischunas al standard nov, e quai entaifer 5 onns suenter ch'il MAC2 è vegnì introducì tar il chantun.
Dals documents da consultaziun poi vegnir prendì invista sin la pagina d'internet dal departament da finanzas e da vischnancas (www.dfg.gr.ch). La consultaziun dura fin ils 15 d'avrigl 2011.

L'adattaziun da la lescha federala d'energia vegn sustegnida
La regenza grischuna approvescha la midada da la lescha d'energia che la confederaziun propona. Per rinforzar l'effizienza energetica duai la confederaziun survegnir ussa la pussaivladad da relaschar directamain pretensiuns minimalas per implants, per vehichels e per apparats. Sco la regenza scriva en sia resposta a la confederaziun survegn il cussegl federal qua tras in bun instrument per pudair reagir en cas da basegn adequatamain e directamain envers las midadas da l'economia da martgà ed envers las cundiziuns generalas da la politica.
Las experientschas mussan che las modas da proceder anteriuras n'han betg manà a la finamira giavischada. Fin ussa preveseva la lescha d'energia d'empruvar da cuntanscher l'emprim cunvegnas da finamiras voluntaras per augmentar l'effizienza energetica. Pir en segunda lingia duain vegnir relaschadas prescripziuns da diever, e quai er mo sche la via voluntara n'ha betg manà al success giavischà.

Las novas sancziuns che la confederaziun prevesa per cas da desditga abusiva vegnan acceptadas mo per part
La regenza grischuna va d'accord mo per part cun la revisiun parziala dal dretg d'obligaziuns che la confederaziun propona areguard las sancziuns en cas da desditga abusiva u nungiustifitgada.
Il sboz preliminar ha la finamira da rinforzar la protecziun cunter la desditga. Tranter auter vegni proponì d'augmentar l'indemnisaziun – en il cas d'ina desditga abusiva u nungiustifitgada – da maximalmain 6 a maximalmain 12 salaris mensils. La regenza n'oppona nagut a questa novaziun, sco ch'ella constatescha en sia resposta a la confederaziun. Ella sa dumonda dentant, sche quest augment po avair in effect starmentant sin il patrun. In tal effect pudess eventualmain avair per consequenza ch'i diminuissan desditgas abusivas u nungiustifitgadas.
Perencunter refusescha la regenza la proposta che desditgas per motivs economics duain esser en il futur abusivas, sch'ina represchentanza elegida dals lavurants è pertutgada da quai. A la regenza pari che la protecziun actuala da las represchentanzas dals lavurants saja suffizienta. Ina revisiun en quest punct avess per consequenza ch'i resultass ina favurisaziun excessiva da las represchentanzas dals lavurants.

Da vischnancas e da regiuns 

• Bregaglia: La constituziun dal circul da la Bregaglia dals 18 da november 2010 vegn approvada.
• Cadi: La constituziun dal circul da la Cadi dals 28 da november 2010 vegn approvada.
• Tavau: La revisiun parziala da la constituziun communala da la vischnanca da Tavau, concludida a la votaziun communala dals 26 da settember 2010, vegn approvada.

 
Contribuziuns chantunalas a differentas instituziuns 

• Chasa da persunas attempadas e da tgira Surlej ad Arosa: Il project preliminar per substituir l'edifizi da la chasa da persunas attempadas e da tgira Surlej ad Arosa vegn approvà. Cun resalva da l'approvaziun definitiva dal project e da la garanzia da la finanziaziun restanta vegn garantida ina contribuziun chantunala da maximalmain 6'500'000 francs al project da construcziun che cumpiglia 40 letgs da tgira renconuschids.
• Center per pedagogia speziala Giuvaulta: Il program da spazi per sanar l'edifizi principal, las gruppas d'abitar e la chasa dals manaders dal center per pedagogia speziala Giuvaulta vegn approvà. Cun resalva da l'approvaziun dal project preliminar e da la garanzia da la finanziaziun restanta vegn empermessa al project ina contribuziun chantunala da construcziun da maximalmain 4'876'000 francs.

 
Gremi: regenza
Funtauna: rg chanzlia chantunala dal Grischun