La regenza grischuna vul cuntinuar cun l'offensiva da qualitad dal turissem grischun. Per la realisaziun ha ella permess in plafonament dals custs da 965'000 francs per ils onns 2011 fin 2012. Ultra da quai ha la regenza tractà differentas fatschentas da vischnancas e da regiuns.

L'offensiva da qualitad dal turissem grischun vegn cuntinuada
Il project da turissem ch'è vegnì lantschà la stad 2010 "Offensiva da qualitad dal Grischun" duai vegnir realisà ils proxims onns. Quai ha concludì la regenza grischuna. Ella ha prendì enconuschientscha dal rapport correspundent pertutgant la fasa iniziala ed ha incumbensà a medem temp l'uffizi per economia e turissem da realisar il project. Per quest intent vegn permess in plafonament dals custs da 965'000 francs per ils onns 2011 fin 2012.
En il rom da la refurma dal turissem grischun "Structuras cumpetitivas e repartiziun da las incumbensas" gioga la realisaziun da la "Offensiva da qualitad dal Grischun" ina rolla impurtanta. La finamira è quella d'introducir in manaschament da qualitad cumplessiv en il chantun Grischun. Ils servetschs ed ils products turistics duain vegnir meglierads en moda ch'els cumpiglian plirs manaschis ed en moda ch'els èn persistents.
En in emprim pass – fin la fin da l'onn 2010 – è vegnida elavurada cun spezialistas e spezialists ed en lavuratoris regiunals la basa d'ina strategia per sviluppar e per segirar la qualitad dal turissem grischun. Per la fasa da realisaziun – dals onns 2011 e 2012 – èn ussa previsas differentas mesiras. En spezial duain ils labels, las certificaziuns ed ils sistems da manaschament da qualitad ch'existan gia vegnir promovids tras mesiras da communicaziun e da furmaziun supplementara e vegnir intermediads a las partenarias ed als partenaris turistics. En questa fasa vegn l'uffizi per economia e turissem a manar il post da coordinaziun ed a collavurar cun las organisaziuns turisticas las pli impurtantas. Suenter vegni examinà, sch'in post extern po surpigliar questa funcziun.

Da vischnancas e da regiuns 

• Grüsch: La revisiun parziala da la planisaziun locala, concludida da la vischnanca da Grüsch ils 21 da matg 2010, vegn approvada.
• Tarasp: La revisiun parziala da la planisaziun locala da la vischnanca da Tarasp dals 22 da zercladur 2009, vegn approvada.
• Zuoz: La revisiun parziala da la planisaziun locala, concludida da la vischnanca da Zuoz ils 25 d'avust 2010, vegn approvada.

 

Gremi: regenza
Funtauna: rg chanzlia chantunala dal Grischun