Il chantun Grischun maina da nov sut www.statistik.gr.ch in portal da statistica interactiv, l'atlas statistic dal Grischun. Cun agid da cartas, tabellas e graficas interactivas vegnan messas a disposiziun datas dal territori detagliadas da la statistica publica per in vast public.

En la societad da savida e d'infurmaziun dad oz crescha la dumonda suenter datas statisticas segiras davart il svilup da la populaziun, da la societad ubain da l'economia. A medem temp creschan uschia er las pretensiuns a la statistica publica, che ha qua sco producenta da datas ina responsabladad particulara. Ses resultats ston tant satisfar a las pretensiuns metodicas las pli autas sco er a medem temp cuvrir champs tematics adina pli vasts.

Ultra da quai èsi er impurtant ch'ils resultats vegnan mess a disposiziun en moda transparenta a la publicitad interessada. Per quest intent porscha il chantun Grischun da nov la pussaivladad da contemplar ina preschentaziun territoriala davart las datas statisticas. Cun l'atlas statistic sut www.statistik.gr.ch pon las datas davart las vischnancas e davart las regiuns, che vegnan dumandadas savens, vegnir analisadas ed en cas da basegn vegnir exportadas e stampadas cun agid da cartas, tabellas e graficas interactivas. Ad utilisadras avanzadas ed ad utilisaders avanzads porscha il program gia ussa la pussaivladad da far imports locals d'atgnas datas.

Il cuntegn dal material da datas che vegn purschì sa concentrescha per il mument principalmain sin ils secturs spezials da la populaziun, da l'economia, dals fatgs da construcziun e d'abitaziuns sco er dal turissem. Actualmain tanschan las bleras datas publitgadas fin l'onn 2010, uschia che la preschentaziun s'orientescha anc vi da la structura communala da l'onn passà. En l'avegnir vegn il portal extendì tematicamain ed analiticamain sco er actualisà cuntinuadamain cun novas datas. Uschia vegnan er ils resultats detagliads da la dumbraziun dal pievel currenta cumplettads ed interpretads en l'atlas statistic a partir da l'atun 2011.

Responsabel per l'atlas statistic è l'uffizi per economia e turissem. La software Géoclip che vegn duvrada en il program vegn gia applitgada en insaquants auters chantuns sco er sin plaun internaziunal.


Infurmaziuns:
Patrick Casanova, uffizi per economia e turissem, tel. 081 257 23 74


Gremi: uffizi per economia e turissem
Funtauna: rg uffizi per economia e turissem