La regenza ha deliberà sias posiziuns tar projects da consultaziun da la confederaziun.

La regenza s'engascha per mantegnair l'export da muvel or da la Svizra
La regenza grischuna sustegna l'iniziativa parlamentara "Mantegnair l'export da muvel or da la Svizra". Sco quai che la regenza scriva en sia resposta da consultaziun a la confederaziun, sto vegnir beneventada or dal puntg da vista da la politica agrara dal Grischun la reintroducziun d'ina basa legala per contribuziuns a favur da l'export d'animals da raz. I sto vegnir fatg tut per crear immediatamain la basa legala necessaria, per che la confederaziun possia puspè pajar las contribuziuns a favur da l'export a partir da l'avust 2011.
En il rom da la politica agrara 2011 ha la confederaziun abolì la basa legala per agids a l'export per muvel svizzer da raz per la fin da l'onn 2009. Suenter è l'export da muvel or da la Svizra praticamain dà ensemen. Pervia da relaziuns inegualas da concurrenza cun la UE e consequentamain pervia da la vendita pli difficila da muvel, en spezial l'atun suenter la stgargiada, duain star a disposiziun totalmain 4 milliuns francs per onn per promover l'export da muvel.
Tenor la regenza pudess la reintroducziun da las contribuziuns a favur da l'export crear relaziuns equilibradas e rinforzar la rentabilitad da l'allevament da muvel, en spezial en il territori da muntogna. Gist per il Grischun sco chantun da muntogna è la vendita da muvel da raz e da muvel da niz da gronda impurtanza.

La finamira da l'iniziativa parlamentara "Basa constituziunala per ina politica cumplessiva a favur da la famiglia" vegn beneventada
La regenza grischuna sustegna da princip l'iniziativa parlamentara "Basa constituziunala per ina politica cumplessiva a favur da la famiglia". Cun in nov artitgel constituziunal duain la confederaziun ed ils chantuns vegnir obligads da promover la cumpatibilitad da la lavur cun la famiglia ed en spezial da procurar per ina purschida da structuras dal di che cumpletteschan la famiglia e la scola e che correspundan als basegns.
Sco quai che la regenza explitgescha en sia resposta da consultaziun beneventa ella bain la direcziun dal project. Tenor sia opiniun na duessan dentant vegnir reglads nagins detagls en la constituziun. Medemamain ston las cumpetenzas tranter la confederaziun ed ils chantuns vegnir separadas cleramain en quest sectur e la participaziun finanziala da la confederaziun sto vegnir preschentada sco obligaziun. La regenza s'exprima perquai per ina formulaziun pli concisa dal nov artitgel constituziunal. La finala refusa la regenza la proposta d'integrar in alinea davart l'armonisaziun dal pajament anticipà d'aliments en la constituziun. Da preschent examinescha il cussegl federal numnadamain medemamain schliaziuns per ils problems actuals. Eventualmain pon vegnir adattadas per quest intent leschas existentas.

Da vischnancas e da regiuns 

• Küblis: La revisiun parziala da la constituziun communala da la vischnanca da Küblis, concludida da la radunanza communala ils 26 da november 2010, vegn approvada.
• Brusio: La revisiun parziala da la planisaziun locala da la vischnanca da Brusio dals 19 da december 2010 vegn approvada.
• Zuoz: La revisiun parziala da la planisaziun locala, concludida da la vischnanca da Zuoz ils 12 da december 2007, vegn approvada.

 

Contribuziuns chantunalas a differentas instituziuns 

• Parc naziunal svizzer: Las activitads per il giubileum da 100 onns dal parc naziunal svizzer l'onn 2014 vegnan sustegnidas cun ina contribuziun en furma d'ina garanzia da deficit da maximalmain 400'000 francs.
• Center da furmaziun Palottis a Schiers: Il project da construcziun per la midada e per la sanaziun dals tracts B e C dal center da furmaziun Palottis a Schiers vegn approvà. A l'instituziun responsabla vegn garantida ina contribuziun da construcziun da 280'000 francs.
• Crusch cotschna dal Grischun: Il nov contract da prestaziuns tranter il chantun Grischun e la crusch cotschna dal Grischun per il project "rait sociala" vegn approvà. Per ils onns 2011 fin 2014 vegn concedida ina contribuziun da totalmain 260'000 francs al project che prevesa da manar in post spezialisà per l'integraziun en il mund da lavur.

 

Projects da vias
La regenza ha approvà totalmain 8'796'000 francs per construir e per sanar ils suandants trajects da vias:
- via dal Lucmagn: lavurs d'impressari e da cuvrida, punt da Fontanivas
- via sursilvana: lavurs d'impressari e da cuvrida, Schluein – Rueun, e punts a spunda, Tavanasa


Gremi: regenza
Funtauna: rg chanzlia chantunala dal Grischun