Il chantun Grischun refusa cleramain la critica cunter la pratica d'agid d'urgenza preschentada communablamain da quatter ovras d'agid ils 14 da favrer 2011. L'agid d'urgenza per requirentas e per requirents d'asil refusads prestada dal chantun Grischun correspunda a las pretensiuns legalas e sustegna tranter auter er la partenza cuntinuada da requirentas e da requirents d'asil refusads. Cuntrari a las pretensiuns da las ovras d'agid sa mussan las prestaziuns crititgadas ch'èn vegnidas fatgas dal chantun Grischun sco raschunaivlas, adequatas e confurmas a la constituziun.

En il rom d'ina campagna naziunala cunter la prestaziun d'agid d'urgenza per requirentas e per requirents d'asil refusads crititgeschan las quatter ovras d'agid Solidarité sans frontières, l'organisaziun svizra d'agid als fugitivs, il post d'observaziun per il dretg d'asil e da persunas estras sco er Amnesty International, tranter auter er la pratica da l'agid d'urgenza dal chantun Grischun. Al chantun Grischun vegni renfatschà da prestar l'agid d'urgenza senza avair prendì invista en ils basegns ils pli elementars da las persunas pertutgadas, da betg resguardar ils giavischs effectivs dals umans, d'als tractar en moda inumana e da surpassar qua tras differents dretgs fundamentals. Cun in appel public a la scheffa dal departament da giustia, segirezza e sanadad, dunna cussegliera guvernativa Barbara Janom Steiner, vegn ella perquai supplitgada da dar in'auter albiert, ch'è meglier accessibel, a las persunas che retschaivan agid d'urgenza e da las render accessiblas differentas prestaziuns supplementaras sco in meglier provediment medicinal u in'autra alimentaziun.

Las reclamaziuns èn nunmotivadas
Il departament da giustia, segirezza e sanadad ha prendì enconuschientscha da l'appel public ed ha examinà las pretensiuns ch'èn vegnidas exprimidas. El vegn a la conclusiun che las reclamaziuns da las ovras d'agid na sajan – tar ina valitaziun objectiva da las circumstanzas effectivas – insumma betg motivadas. Ord quest motiv refusa il chantun Grischun la critica en tutta furma.

L'uffizi da fatgs da polizia e da dretg civil ch'è responsabel per la prestaziun d'agid d'urgenza, concepescha quella tenor ils basegns concrets da las persunas che retschaivan agid d'urgenza. L'agid purschì vegn fixà sin basa dals differents basegns individuals da las singulas persunas che retschaivan agid d'urgenza (creschids, dunnas en speranza, uffants e.u.v.). Per tut las persunas che abiteschan en il center d'expulsiun è alura er garantì in provediment medicinal suffizient. Tenor la giurisdicziun dal tribunal federal correspunda l'agid d'urgenza concedì dal chantun, en il senn d'in agid transitoric, cumplettamain a las pretensiuns fatgas a l'agid d'urgenza. La renfatscha che la furma d'agid d'urgenza elegida violeschia dretgs fundamentals u cunvegnas internaziunalas è medemamain dal tuttafatg malfundada.

La pratica na vegn betg midada
En vista al fatg che la critica exprimida da las ovras d'agid è subjectiva e nungiustifitgada na datti er nagin motiv d'ademplir las pretensiun e da midar las relaziuns da sustegn e d'assistenza. Anzi, il chantun Grischun sa stenta cun sia pratica da prestar agid d'urgenza, da sustegnair er en l'avegnir la partenza da las requirentas e dals requirents d'asil refusads ed uschia da gidar a realisar las decisiuns d'asil cun vigur legala.


Infurmaziuns:
- cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01
- Heinz Brand, schef da l'uffizi da fatgs da polizia e da dretg civil, tel. 081 257 25 21


Gremi: departament da giustia, segirezza e sanadad
Funtauna: rg departament da giustia, segirezza e sanadad