Il chantun Grischun sto reglar da nov la finanziaziun dals ospitals e l'adattar per l'onn 2012 a las directivas novas da la confederaziun. La regenza grischuna ha deliberà la missiva correspundenta tar la revisiun parziala da la lescha per promover la tgira da persunas malsaunas. Il cussegl grond vegn a tractar questa fatschenta en la sessiun da zercladur 2011.

La lescha federala davart l'assicuranza da malsauns ch'è vegnida midada l'onn 2007 è dapi il 1. da schaner 2009 en vigur. Ella cuntegna novas directivas per la finanziaziun dals ospitals sco er per la planisaziun dals ospitals. Tenor las disposiziuns transitoricas ston ils chantuns adattar lur planisaziuns dals ospitals al nov dretg federal, e quai fin il pli tard l'onn 2015. La reordinaziun da la finanziaziun dals ospitals sto vegnir introducida en ils chantuns fin il pli tard ils 31 da december 2011.

Il chantun Grischun vul l'emprim adattar la finanziaziun dals ospitals e lura en in segund pass las directivas da la confederaziun en il sectur da la planisaziun dals ospitals. Quai vegn fatg pli tard cun in project da revisiun separà che concerna la lescha per promover la tgira da persunas malsaunas.

Libertad d'agir limitada per ils chantuns
Per realisar las directivas da la confederaziun è la libertad d'agir limitada per ils chantuns. Uschia perscriva la confederaziun als chantuns che ils tractaments medicinals en ospitals ed en clinicas ston vegnir indemnisads tras pretschs pauschals pro cas unitars che sa refereschan a las prestaziuns, uschenumnadas DRG (diagnosis related groups), e quai a partir da l'onn 2012 en l'entira Svizra. E, ils custs d'investiziun ston esser cuntegnids en l'avegnir en questas pauschalas pro cas. Quai vul dir ch'ils ospitals ston finanziar sezs las investiziuns or dals retgavs currents a partir da l'onn 2012. Ultra da quai ston ils chantuns er sa participar – en il senn d'in tractament egual dals ospitals publics e dals ospitals privats – als custs d'in tractament staziunar en in ospital privat, sche quel sa chatta sin ina glista d'ospitals. Viceversa pon las pazientas ed ils pazients tscherner libramain in dals ospitals che figurescha sin ina glista d'ospitals.

A medem temp ha la confederaziun determinà ch'il maun public sto surpigliar almain 55 pertschient da las pauschalas che vegnan fixadas tranter ils ospitals e las assicuranzas da malsauns. Ils 45 pertschient restants van a donn e cust da l'assicuranza da malsauns. Cun quels novs instruments da la finanziaziun da la prestaziun e da la libra tscherna da l'ospital vul la confederaziun promover la rentabilitad e la concurrenza da qualitad dals ospitals.

La regenza stat vinavant tar quai ch'il project per la finanziaziun dals ospitals ch'ella ha suttamess al cussegl grond saja sco enfin ussa ina incumbensa communabla dal chantun e da las vischnancas. Sco ch'ella scriva en sia missiva tar il sboz per ina revisiun parziala da la lescha per promover la tgira da persunas malsaunas, vegnan ils custs per tractaments staziunars en ils ospitals repartids tranter chantun e vischnancas. Il chantun sto surpigliar 85 pertschient e la vischnanca 15 pertschient da la part dal maun public. La regenza vul duvrar la medema clav da repartiziun per prestaziuns d'utilitad publica sco er per servetschs da transport en cas d'urgenza e d'ambulanza dals ospitals.

En connex cun la realisaziun da la nova finanziaziun dals ospitals po il chantun Grischun sa basar sin las experientschas ch'èn vegnidas fatgas cun la finanziaziun dals ospitals che s'orientescha a la prestaziun, ch'è gia vegnida introducida l'onn 2005 en il chantun. Uschia ha la gronda part dals ospitals e da las clinicas gia introducì dapi daditg il far giu quint cun pauschalas pro cas, e la registraziun en moda differenziada da las datas dals custs e da las prestaziuns è standard.

La calculaziun da model mussa custs supplementars
Constataziuns davart las consequenzas che las novaziuns han pon per il mument vegnir fatgas mo en moda fitg restrenschida, damai che l'autezza da las pauschalas pro cas n'è anc betg enconuschenta. Tenor la calculaziun da model che sa basa sin ina decisiun davart la pauschala pro cas en in chantun da la Svizra centrala ch'è vegnida prendida dal tribunal administrativ federal il december 2010, vegn la nova finanziaziun dals ospitals a custar circa 16.3 milliuns francs dapli per onn al maun public en il Grischun. La raschun per la grevezza pli gronda dal maun public è che ospitals privats sco er ospitals extrachantunals, che sa chattan sin la glista dals ospitals, èn da nov subvenziunabels. Engrevgiads supplementarmain vegnan tant il chantun sco er las vischnancas. Tar il chantun crescha la grevezza finanziala annuala per circa 13.8 milliuns francs da 152 sin 165.8 milliuns francs. Tar las vischnancas s'augmentan ils custs per circa 2.5 milliuns francs da 24.7 sin 27.2 milliuns francs. Cun la nova finanziaziun dals ospitals vegnan ils ospitals publics en il chantun a survegnir – tenor la calculaziun da model – contribuziuns da las assicuranzas da malsauns e dal maun public che han tut en tut circa la medema autezza sco cun la regulaziun vertenta.


Infurmaziuns:
cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01


Gremi: regenza
Funtauna: rg chanzlia chantunala dal Grischun