La regenza grischuna ha concludì da sustegnair er vinavant finanzialmain l'uniun alpinavera che commerzialisescha products regiunals. Per ils onns 2012 fin 2016 ha ella approvà ina contribuziun chantunala da 700'000 francs.

L'uniun alpinavera survegn contribuziuns chantunalas per ulteriurs tschintg onns
Il chantun Grischun sustegna er ils proxims tschintg onns l'uniun alpinavera che s'engascha per la commerzialisaziun da products regiunals. Per la fasa da consolidaziun dals onns 2012 fin 2016 ha la regenza grischuna concludì ina contribuziun da totalmain 700'000 francs.
L'uniun alpinavera ch'è vegnida fundada l'onn 2006 ha la finamira d'augmentar la valur agiuntada al lieu, e quai cun l'elavuraziun regiunala e cun l'utilisaziun da products or dal territori da muntogna da las Alps. En quest connex porscha alpinavera in marketing communabel a tut las producentas e producents sco er a commerziantas e commerziants directs. Sco partenaris han pudì vegnir gudagnads ils chantuns vischins Glaruna ed Uri che – sco chantuns muntagnards – elavuran – tuttina sco il Grischun – il medem territori da vendita.
Ina bilantscha provisorica mussa che las finamiras han per gronda part pudì vegnir cuntanschidas e per part schizunt surpassadas. En tut po vegnir constatà ch'il project alpinavera è sa sviluppà cun success. En il fratemp èn involvidas circa 270 interpresas e certifitgads passa 500 products cun ina svieuta da circa 70 milliuns francs tenor las pretensiuns minimalas per products regiunals. Tenor l'opiniun da la regenza è la collavuraziun sa cumprovada e la cumprova da prestaziun d'alpinavera mussa che las mesiras per la promoziun da la vendita fan effect e che la lavur vegn respectada en las branschas.
Suenter in cumenzament cun success duai en ils proxims tschintg onns vegnir duvrada la fasa da consolidaziun oravant tut per rinforzar e per segirar l'organisaziun e la finanziaziun. La fasa d'installaziun dals onns 2007 fin 2011 ha il chantun Grischun sustegnì cun ina contribuziun da 1'075'000 francs.

Da vischnancas e da regiuns 

• Silvaplauna: La regenza ha approvà la taglia sin abitaziuns secundaras ch'è vegnida concludida ils 17 da favrer 2010 da las votantas e dals votants da la vischnanca da Silvaplauna, e quai en il rom d'ina revisiun parziala da la lescha da construcziun. La regulaziun da la quota d'emprimas abitaziuns e da la contingentaziun d'abitaziuns secundaras che la vischnanca aveva er concludì quella giada, ha la regenza approvà gia l'avust 2010.
• Samignun: La revisiun parziala da la planisaziun locala, concludida da la vischnanca da Samignun ils 11 da fanadur 2010, vegn approvada.
• Surselva: Il plan directiv regiunal "Concept utilisaziun turistica da las Alps", ch'è vegnì concludì da la corporaziun regiunala Surselva ils 17 da settember 2010, vegn approvà.

 
Contribuziuns chantunalas a differentas instituziuns 

• Bogn Engiadina Scuol SA: Cun resalva da la finanziaziun totala reglada vegn concedì – en il rom da la nova politica regiunala da la confederaziun (NPR) – in emprest da 2'000'000 francs al Bogn Engiadina Scuol SA e quai per engrondir resp. per renovar il Bogn Engiadina Scuol. Per il project vegn a medem temp garantida ina contribuziun chantunala da 336'600 francs.
• Campadi Muglin a Müstair: Cun resalva da la finanziaziun totala segirada vegn concedì – en il rom da la nova politica regiunala da la confederaziun (NPR) – in emprest da 265'000 francs a la construcziun nova dal campadi Muglin a Müstair. Ultra da quai vegn concedida ina contribuziun chantunala da 44'600 francs.
• Federaziun grischuna per il sport: La federaziun grischuna per il sport survegn l'onn 2011 ina contribuziun da maximalmain 31'000 francs or dal fond da sport per l'activitad generala da la suprastanza, per realisar il parlament da sport, per metter a disposiziun ina infurmaziun giuridica, per surdar il premi grischun per il sport l'onn 2011 e per realisar la surdada dal premi per il sport.

 
Projects da vias
La regenza ha approvà totalmain 3'875'000 francs per construir e per sanar ils suandants trajects da vias:
- via d'Engiadina: lavurs d'impressari, sviament da Scuol
- via sursilvana: lavurs d'impressari e da cuvrida, Schluein – Rueun

Chaussas persunalas 

• Arno Lombardini, domicilià ad Andeer, è vegnì elegì per il 1. da mars 2011 sco substitut dal manader da l'inspecturat dal register funsil e dal register da commerzi.

 

Gremi: regenza
Funtauna: rg chanzlia chantunala dal Grischun