En il rom da la nova finanziaziun dals ospitals ha la regenza grischuna fixà la part dal maun public vi da las pauschalas pro cas da l'onn 2012 sin 55 pertschient. Ultra da quai ha ella formulà sia posiziun a la confederaziun davart l'adattaziun planisada da l'etichetta d'energia per autos da persunas.

Fixà la part dal maun public vi da las pauschalas pro cas da l'onn 2012 sin 55 pertschient
La regenza grischuna ha fixà la part dal maun public vi dals custs da las pauschalas per tractaments staziunars – ch'èn vegnidas fixadas tranter ils ospitals e las assicuranzas da persunas malsaunas per l'onn 2012 – sin 55 pertschient.
Per l'introducziun da la nova finanziaziun dals ospitals per l'onn 2012 ha la confederaziun relaschà disposiziuns transitoricas. Per consequenza pon chantuns cun premias da l'assicuranza da malsauns sut la media – sco il Grischun – reducir l'indemnisaziun dal maun public durant tschintg onns da 55 sin fin a 45 pertschient. A partir da l'onn 2017 sto il maun public – quai vul dir chantuns e vischnancas – surpigliar almain 55 pertschient dals custs. Chantuns ston mintgamai fixar fin la fin mars la part dal maun public per il proxim onn chalendar.
Cun la decisiun da la regenza desista il chantun Grischun da reducir la part dal maun public per l'onn 2012. D'ina vart correspunda la repartiziun da 55 pertschient a quint dal maun public e 45 pertschient a quint da las assicuranzas da malsauns circa a la clav da repartiziun che vegn gia duvrada dapi onns per la finanziaziun dals ospitals. A la regenza para questa part da l'autra vart er adequata per restrenscher ad ina dimensiun supportabla l'augment da las premias. Ina reducziun da la part dal maun public a 45 pertschient avess per consequenza custs supplementars da 27 milliuns francs per las assicuranzas, quai che correspunda ad in augment da las premias da circa 7 pertschient.
La repartiziun da la part dal maun public tranter il chantun e las vischnancas da domicil vegn il cussegl grond a fixar en la sessiun da zercladur cur ch'el vegn a tractar la missiva davart la revisiun parziala da la lescha da sanadad. En quest connex propona la regenza ch'il chantun surpiglia 85 pertschient e che las vischnancas surpiglian 15 pertschient dals custs dal maun public.

La regenza beneventa che l'etichetta d'energia per autos da persunas vegn repassada
La regenza grischuna è da princip d'accord cun il fatg che l'etichetta d'energia per autos da persunas che vegn previsa da la confederaziun vegn repassada. Las novaziuns proponidas sa tegnan vid las pitgas cumprovadas da l'etichetta d'energia, megliereschan dentant ellas en intgins puncts debels. Quai exprima la regenza en sia resposta tar la consultaziun davart la revisiun da l'ordinaziun d'energia da la confederaziun.
La confederaziun vul meglierar l'etichetta d'energia existenta per autos da persunas. En spezial duai il consum absolut da carburant vegnir valità pli fitg tar la classificaziun dals vehichels en las categorias da l'effizienza energetica. L'etichetta nova surveglia er tracziuns alternativas sco vehichels che vegnan mess en moviment tras electricitad u tras gas. Las categorias da l'effizienza energetica duain en l'avegnir vegnir adattadas annualmain tenor il stadi da la tecnica il pli nov. La regenza beneventa en spezial ch'il champ d'applicaziun da l'etichetta d'energia sa restrenscha vinavant sin autos da persunas e ch'i vegn er vinavant classifitgà en set categorias d'effizienza energetica (A fin G).

Da vischnancas e da regiuns 

• Andeer: Il project per revitalisar il Mühlbach ad Andeer vegn approvà. Als custs vegn concedida ina contribuziun da 70'000 francs.
• Landquart: Al consorzi per aua persa da Landquart vegn garantida ina contribuziun da maximalmain 451'400 francs per engrondir e per modernisar la serenera da Landquart (Igis).
• Lostallo: Il project cunter crudada da crappa "Arabella" sin territori da la vischnanca da Lostallo vegn approvà e sustegnì cun ina contribuziun da maximalmain 1'237'500 francs.
• Igis: La revisiun parziala da la planisaziun locala, concludida da la vischnanca dad Igis ils 27 da zercladur 2010, vegn approvada.

 
Contribuziuns chantunalas a differentas instituziuns 

• Agid umanitar: A la chadaina da fortuna vegn pajada ina contribuziun da 40'000 francs a favur da l'acziun d'agid d'urgenza en il Giapun ed a la Caritas ina contribuziun da 10'000 francs a favur da las fugitivas e dals fugitivs sco er da las persunas stgatschadas da la Libia.

 
Projects da vias
La regenza ha approvà totalmain 2'000'000 francs per construir e per sanar ils suandants trajects da vias:
- via da l'Alvra: lavurs d'impressari, Preda – Palpuogna
- via d'Engiadina: lavurs d'impressari e lavurs da cuvrida, Brail Zernez


Gremi: regenza
Funtauna: rg chanzlia chantunala dal Grischun