La regenza grischuna ha abolì l'ordinaziun davart las cundiziuns d'engaschament per ils schefmedis ed adattà las taxas da las patentas da chatscha a la chareschia. Ultra da quai ha ella formulà sia posiziun tar in project da consultaziun da la confederaziun.

L'ordinaziun davart las cundiziuns d'engaschament per ils schefmedis vegn abolida
L'ordinaziun davart las cundiziuns d'engaschament per ils schefmedis ed ils medis directurs dals ospitals cun dretg da contribuziuns en il chantun Grischun vegn abolida per ils 31 da december 2011. Quai ha concludì la regenza grischuna.
En sia resposta ad ina intervenziun parlamentara ha la regenza menziunà ch'ella saja pronta d'abolir l'ordinaziun. Il cussegl grond ha acceptà l'incumbensa en la sessiun d'avrigl cun 77 cunter 11 vuschs. Tras l'aboliziun da l'ordinaziun duain ils ospitals survegnir a partir da l'onn 2012 – a medem temp sco la midada a la nova finanziaziun dals ospitals – las libertads necessarias d'interprendiders er en il sectur da l'engaschament da schefmedis e da medis directurs.

Las taxas da las patentas da chatscha vegnan adattadas a la chareschia
En il chantun Grischun vegnan las taxas da las patentas per la chatscha auta e bassa adattadas a la chareschia. Quai ha concludì la regenza grischuna, ed ella ha mess en vigur las adattaziuns correspundentas per il 1. da zercladur 2011.
Per chatschadras e per chatschaders cun domicil en il chantun importan las taxas da patenta da nov 697 francs per la chatscha auta (fin ussa 690 francs) e 281 francs per la chatscha bassa (fin ussa 278 francs). L'ultima giada èn las taxas da las patentas da chatscha vegnidas adattadas la primavaira 2010. Dapi lura è s'accumulada ina chareschia dad 1,05 pertschient. Tenor la regenza èsi giustifitgà e motivà d'augmentar las taxas da patenta en questa dimensiun.

La regenza sustegna in rinforzament da la surveglianza da l'assicuranza da malsauns sociala
La regenza grischuna va d'accord cun il sboz da la lescha federala davart la surveglianza da l'assicuranza da malsauns sociala. Tras la nova lescha vul la confederaziun rinforzar la surveglianza dals assicuraders da malsauns. Tranter auter èsi previs d'installar in'autoritad da surveglianza ch'è independenta da l'administraziun federala.
Sco che la regenza scriva en sia resposta da consultaziun a la confederaziun, portia quai dapli transparenza e dapli segirezza finanziala als assicuraders da malsauns survegliads, sche l'assicuranza da malsauns sociala vegn survegliada d'ina autoritad independenta. La nova surveglianza è ina meglieraziun considerabla envers las controllas actualas da l'uffizi federal da sanadad publica, che ha mo cumpetenzas limitadas.

Da vischnancas e da regiuns

• Alvagni: La revisiun parziala da la planisaziun locala, concludida da la vischnanca d'Alvagni ils 27 d'october 2010, vegn approvada. 
• Ardez: La revisiun parziala da la lescha da construcziun, concludida da la vischnanca d'Ardez ils 14 da december 2010, vegn approvada. 
• Breil: La revisiun parziala da la planisaziun locala da la vischnanca da Breil dals 26 da november 2010 vegn approvada. 
• Puntraschigna: La lescha per promover la construcziun d'emprimas abitaziuns e per restrenscher la construcziun d'abitaziuns secundaras, concludida da la vischnanca da Puntraschigna ils 13 da settember 2010, vegn approvada. 
• Falera: En sia consultaziun a l'uffizi federal da traffic concernent la dumonda da l'Arena alva telefericas SA, Laax, dals 10 da favrer 2011 da dar la concessiun tenor il dretg davart las telefericas e d'approvar ils plans per construir e per manar ina sutgera da sis Alp Dado – Crest la Siala (implant da remplazzament) sin il territori da la vischnanca da Falera, propona la regenza da dar la concessiun.

 Contribuziuns chantunalas a differentas instituziuns

• Contribuziuns da la fundaziun dr. Stephan à Porta: Or dal retgav net da l'onn da gestiun 2010 da la fundaziun dr. Stephan à Porta duai – tenor la proposta da la regenza – vegnir repartida ina contribuziun da totalmain 352'000 francs a las suandantas instituziuns caritativas grischunas d'utilitad publica: Benevol Grischun, Cuira, jugend.gr, Cuira, champs da vacanzas Rätia, Panaduz, uniun per l'agid da survivenza dal Grischun, Cuira, associaziun dals confamigliars da persunas cun schizofrenia e cun disturbis psichics dal Grischun (VASK), Cuira, Caritas dal Grischun, Cuira, Crusch blaua, Cuira, Il maun offert, Son Gagl, team per l'agid a sasez, Cuira, Crusch cotschna, Cuira, Lia cunter il cancer Grischun, Cuira, Pro infirmis, Cuira. 
• Dieschma d'alcohol e taxas da patenta d'alcohol: La regenza ha repartì la quota dal retgav net da la dieschma d'alcohol en l'autezza da 660'400 francs per l'onn 2011. Quests daners vegnan duvrads per projects da prevenziun, per custs da tractament sco er per projects da perscrutaziun e da furmaziun. Medemamain ha la regenza repartì la quota dal retgav net da las taxas da patenta d'alcohol en l'autezza da 387'980 francs per intents d'utilitad publica. 
• RegioViamala: Per il manaschament regiunal vegn garantida a la corporaziun regiunala regioViamala – per la perioda 2011 fin 2015 – ina contribuziun totala da maximalmain 825'000 francs en il rom da la nova politica regiunala da la confederaziun (NPR).

Projects da vias
La regenza ha approvà totalmain 14'610'000 francs per construir e per sanar ils suandants trajects da vias:
- via d'Engiadina: lavurs d'impressari, Lavin – Giarsun; lavurs d'inschigner, punt a spunda da Magnacun e punt da Magnacun
- via taliana: lavurs d'impressari, Nufenen, entaifer il vitg; protecziun cunter crudada da crappa, Arabella
- via da Miraniga: lavurs d'impressari, Miraniga – Misanenga
- via ost dal Partenz: lavurs d'impressari e da cuvrida, Claustra Vitg, Gruobenstutz – aual da Schlappin
- via da Stussavgia: lavurs d'impressari, Rüfenenwald 2
- via da la Muntogna da Schons: lavurs d'impressari, Donat – Pazen
- via da Tälfsch: lavurs d'impressari e da cuvrida, Prada – Tälfsch

Chaussas persunalas

• Jürg Simonett, directur dal museum retic, domicilià a Cuira, è vegni elegì sco substitut da la manadra dal post da servetsch da l'uffizi da cultura.

Gremi: regenza
Funtauna: rg chanzlia chantunala dal Grischun