Il post da stab per l'egualitad da las schanzas envida cuminaivlamain cun ses partenari dal project, il post spezialisà UND, e cun sia partenaria dal project, l'associaziun "denkstation", ils 12 da matg 2011, a las 18.15, en la sala da la Chalavaina, Cuira, a l'emprima occurrenza d'infurmaziun davart il project "structuras favuraivlas per famiglias sco factur da success". En il center stat la discussiun davart las schanzas ed il niz da cundiziuns da lavur favuraivlas per famiglias en manaschis pitschens e mesauns sco er las sfidas ch'èn colliads cun quai.

L'occurrenza preschenta in vast spectrum da puntgs da vista da l'economia, da federaziuns e da la politica sco er dad interpresas pitschnas e mesaunas (IPM), che han gia experientschas cun la realisaziun da mesiras en quest sectur, e da persunas spezialisadas. Ultra da quai vegn preschentada ina IPM che sa participescha al project "IPM grischunas en acziun".

L'occurrenza sa drizza ad IPM, a persunas ch'èn responsablas per il persunal, a persunas da la politica e da l'economia sco er a lavurantas ed a lavurants che s'engaschan per mesiras economicas innovativas e favuraivlas per famiglias e ch'èn interessads vi d'ina ballantscha tranter famiglia e professiun cun success.

En il rom dal project "IPM grischunas en acziun" survegnan las IPM grischunas la pussaivladad d'analisar, sche lur cundiziuns da lavur porschan structuras favuraivlas per famiglias, da sviluppar mesiras individualas e da las testar sut instrucziun professiunala. La finamira dal program è quella da laschar profitar las IPM localas da las experientschas d'autras firmas e d'autras regiuns e da crear ina conscienza per ils aspects positivs economics da las cundiziuns da lavur ch'èn favuraivlas per las famiglias. Il project vegn accumpagnà d'in cussegl consultativ cun represchentantas e cun represchentants da federaziuns economicas, da possessuras e da possessurs dad IPM sco er da persunas da la politica e da l'economia. El vegn finanzià dal chantun Grischun, da la confederaziun e da sponsurs grischuns.

Annunzias per l'occurrenza vegnan acceptadas fin ils 10 da matg sut info@chancengleichheit.gr.ch u tel. 081 257 35 70.

Las cundiziuns da participaziun per las IPM sco er la descripziun detagliada dal project sa chattan sin la pagina d'internet dal post da stab per l'egualitad da las schanzas: www.stagl.gr.ch. 


Infurmaziuns:
Susanna Mazzetta, manadra dal project, post da stab per l'egualitad da las schanzas, tel. 081 257 35 72 / natel 079 483 74 01, e-mail: Susanna.Mazzetta@stagl.gr.ch  


Gremi: post da stab per l'egualitad da las schanzas
Funtauna: rg post da stab per l'egualitad da las schanzas