Il comité internaziunal d'accumpagnament dal program d'Interreg transcunfinal "Italia-Svizra" sa raduna quest onn ils 24 da matg en il Palazzo Castelmur a Stampa.

En discussiun stat l'infurmaziun davart il stadi da la realisaziun dal program cun ils accents sin ils projects strategics e l'approvaziun dal rapport annual e dal rapport davart l'ambient.

Il Grischun sa participescha cun totalmain 29 projects transcunfinals e cun 3 projects strategics al program dad Interreg IV.

Preschents èn represchentantas e represchentants da l'UE, da la politica e da l'administraziun da l'Italia e da la Svizra sco er las commembras ed ils commembers dal comité directiv da las regiuns da la Val d'Aosta, dal Piemunt, da la Lumbardia, da Bulsaun, dal Vallais, dal Tessin e dal Grischun. La represchentanza politica dal chantun ospitant vegn ademplida dal vicepresident dal cussegl grond Ueli Bleiker.

Dapi l'onn 1990 stat l'Interreg per l'integraziun da regiuns da cunfin en il territori europeic. L'Interreg promova e finanziescha projects ch'èn adattads da promover in svilup equilibrà da quests territoris cun l'agid da cooperaziuns internaziunalas.


Infurmaziun per las medias:
L'occurrenza che cumenza a las 10.30 è publica. La lingua da la dieta è talian. A la fin da la dieta datti a partir da las 13.00 la pussaivladad per las collavuraturas e per ils collavuraturs da las medias da far intervistas cun singulas persunas u da dumandar infurmaziuns generalas davart ils programs per promover las structuras.


Infurmaziuns:
- Walter Castelberg, uffizi per economia e turissem, tel. 081 257 23 71
- Maurizio Michael, secretariat tecnic Milaun, tel. 079 798 90 92


Gremi: uffizi per economia e turissem
Funtauna: rg uffizi per economia e turissem