La realisaziun da la refurma da vischnancas e dal territori cumenza cun il project parzial "Vischnancas burgaisas". La regenza grischuna ha avert la procedura da consultaziun en chaussa. Il punct central dal project è la renunzia a la fusiun automatica da las vischnancas burgaisas, sche las vischnancas politicas fusiuneschan. Uschia sa lascha eliminar in impediment existent per fusiuns da vischnancas, perquai che las vischnancas burgaisas n'èn betg pli pertutgadas directamain d'ina fusiun da las vischnancas politicas.

En sia sessiun da favrer 2011 è il cussegl grond sa fatschentà intensivamain cun la refurma da vischnancas e dal territori. En quest connex è il parlament s'exprimì per ina simplificaziun fundamentala da las structuras statalas che duai vegnir realisada d'ina vart cun agid d'ina refurma da vischnancas e da l'autra vart cun ina refurma dal territori. Las decisiuns fundamentalas cleras dal cussegl grond èn stadas in segn per la regenza da prender per mauns immediatamain las lavurs da realisaziun.
 
Stgars 3 mais pli tard vegn il project parzial "Vischnancas burgaisas" – sco emprim project da realisaziun en il rom da la refurma da vischnancas – tramess en consultaziun. Tenor l'art. 89 da la lescha da vischnancas actuala vala la fusiun da las vischnancas politicas er automaticamain per las vischnancas burgaisas correspundentas. Tenor la voluntad dal cussegl grond duai vegnir abolì quest automatissem che ha effects dischavantagius en la pratica per fusiuns da vischnancas. La fusiun da las vischnancas politicas na chaschuna betg pli automaticamain la fusiun da las vischnancas burgaisas. Uschia po vegnir eliminà in eventual impediment da fusiun.

Per quest intent ston vegnir adattadas la constituziun chantunala (art. 61) sco er plirs artitgels da la lescha da vischnancas. En l'avegnir duain las vischnancas burgaisas pudair fusiunar sco fin ussa en il rom da fusiuns da vischnancas politicas, ellas na ston dentant betg far quai stringentamain. Quai ha per consequenza che las vischnancas burgaisas vertentas pon exister er vinavant, malgrà la fusiun da vischnancas politicas. Suenter ina fusiun po il territori d'ina vischnanca politica perquai cumpigliar en l'avegnir pliras vischnancas burgaisas. Quellas disponan vinavant da la facultad burgaisa respectiva ed èn cumpetentas per conceder il dretg da burgais.

Perquai che las vischnancas burgaisas pon exister vinavant en il futur – independentamain d'ina fusiun da las vischnancas politicas – vegn stritgada la pussaivladad da pudair externalisar a medem temp la facultad burgaisa or da la vischnanca burgaisa. La regenza vul uschia evitar che la finamira da simplifitgar las structuras vegnia impedida e ch'i dettia anc ulteriurs subjects giuridics. Da quai poi mo vegnir divergià, sche las vischnancas burgaisas existentas fusiuneschan cun la vischnanca politica e sa schlian a medem temp. In tal subject giuridic externalisà vegn surveglià da la vischnanca politica, e quella sto guardar ch'il bain public restia en ils mauns da la publicitad.

La consultaziun dura fin la fin d'avust 2011. Dals documents da consultaziun poi vegnir prendì invista sin la pagina d'internet dal departament da finanzas e da vischnancas (www.dfg.gr.ch).

Las ulteriuras incumbensas dals conclus dal cussegl grond vegnan elavuradas en projects parzials. Ils projects correspundents vegnan tramess en consultaziun en il decurs dals onns 2011 fin 2012.


Infurmaziuns:
Cusseglier guvernativ dr. Martin Schmid, schef dal departament da finanzas e vischnancas, tel. 081 257 32 01


Gremi: regenza
Funtauna: rg chanzlia chantunala dal Grischun