Il scumond absolut da far fieu en ils guauds ed en la vischinanza dals guauds è abolì en l'entir Grischun. Malgrà quai ston ins esser fitg precaut e far fieu per grillar mo en fuclars fixs. Fieus da rumida en l'agricultura èn scumandads tenor l'ordinaziun davart la protecziun da l'aria.

Las precipitaziuns dals ultims dis e la sbassada da la temperatura han manà ad ina tscherta detensiun en connex cun il privel d'incendis da guaud. Perquai ha l'uffizi forestal abolì il scumond absolut da far fieu en il chantun Grischun. Tuttina è il terren dals guauds anc adina per gronda part sitg ed il privel d'incendis da guaud correspundentamain grond. Perquai ston ins esser spezialmain precaut cun grillar. Fieus dastgan vegnir fatgs mo en fuclars fixs, ston vegnir survegliads ed – avant che bandunar la plazza da grillar – stizzads dal tuttafatg. Plinavant na dastg'ins betg simplamain bittar davent products da fimar e battafieus.

Che la situaziun sa mitigeschia dal tuttafatg, dastga vegnir spetgà pir suenter ina perioda intensiva da plievgia. En cas che las temperaturas s'augmentan puspè e che l'aura resta bella sto vegnir fatg quint ch'il privel d'incendis da guaud crescha danovamain. Perquai na poi betg vegnir exclus ch'il scumond da far fieu sto alura puspè vegnir introducì.

Tenor l'ordinaziun davart la protecziun da l'aria èsi scumandà da princip d'arder ruments verds che n'èn betg sitgs avunda. En cas da fieus da rumida èsi sa mussà en la pratica ch'il material verd n'è mai sitg avunda. Cuntravenziuns cunter quest scumond vegnan chastiadas. Infurmaziuns davart l'arder ruments verds dat l'uffizi per la natira e l'ambient.

Ulteriuras infurmaziuns sco er la valitaziun da la situaziun actuala chattais Vus sut: www.wald.gr.ch  


Infurmaziuns:
- Andrea Kaltenbrunner, uffizi forestal, tel. 081 257 38 68
- Georg Thomann, uffizi per la natira e l'ambient, tel. 081 257 29 52


Gremi: uffizi forestal
Funtauna: rg uffizi forestal