Ensemen cun auters posts spezialisads ha il post da stab per l'egualitad da las schanzas publitgà ina nova documentaziun davart il tema "Sanadad tenor las schlattainas: maletgs dal corp". La publicaziun documentescha ina retscha d'occurrenzas internaziunala che ha gì lieu l'onn passà.

Tge maletg han dunnas ed umens da lur corp? Tenor tge ideals al tractan ellas ed els? Datti il corp perfetg? E pertge vegn celebrà in tal cult enturn il corp? Tge pretsch pajan mattas e mats, dunnas ed umens per cuntanscher in maletg dal corp ideal?

Da questas dumondas è s'occupada l'onn 2010 ina retscha d'occurrenzas internaziunala cun referats specifics a Bregenz, a Cuira, a Herisau ed a Vaduz. Ussa è cumparida la documentaziun tar questas occurrenzas. Ella cuntegna tut ils referats, las adressas da contact da las referentas e dals referents sco er infurmaziuns davart ina schelta da litteratura. Ultra da quai cumpiglia la documentaziun indicaziuns davart l'exposiziun accumpagnanta "Zona libra da barbies" e davart la preschentaziun "Maletgs dal corp en las medias – realitads construidas da dunnas e d'umens" dal center da mattas Amazone a Bregenz.

La documentaziun po vegnir empustada gratuitamain tar il post da stab per l'egualitad da las schanzas (info@chancengleichheit.gr.ch u tel. 081 257 35 70) e stat er a disposiziun sco document da PDF sin la pagina d'internet www.stagl.gr.ch.


Infurmaziuns:
Silvia Hofmann, manadra dal post da stab per l'egualitad da las schanzas, tel: 081 257 35 71, e-mail: Silvia.Hofmann@stagl.gr.ch  


Gremi: post da stab per l'egualitad da las schanzas
Funtauna: rg post da stab per l'egualitad da las schanzas