A chaschun da las proximas elecziuns dal cussegl naziunal dals 23 d'october 2011 pon las Svizras ed ils Svizzers a l'exteriur ch'èn registrads en il chantun Grischun eleger per l'emprima giada sin via electronica.

Suenter duas emprovas da success a chaschun da las votaziuns federalas dals 28 da november 2010 e dals 13 da favrer 2011 pon las Svizras ed ils Svizzers a l'exteriur vuschar per l'emprima giada sin via electronica tar elecziuns. Il cussegl federal ha permess las dumondas correspundentas dals chantuns Argovia, Basilea-Citad, Grischun e Son Gagl.

Circa 2'500 u 90 pertschient da las Svizras e dals Svizzers a l'exteriur ch'èn registrads en il Grischun vivan en in stadi, nua ch'il vote électronique è pussaivel. En las lavurs preparatoricas èn involvidas en il Grischun tut las 178 vischnancas. Cuntrari ad auters chantuns na maina il Grischun numnadamain betg in register electoral central per las Svizras e per ils Svizzers a l'exteriur. En il Grischun èn las vischnancas cumpetentas per il register e per la spediziun dals documents d'elecziun. Medemamain vegnan las singulas vischnancas a clamar giu las vuschs dadas sin via electronica e vegnan alura a transferir quellas en il program d'elecziun chantunal ensemen cun las ulteriuras vuschs entradas. Tras il vote électronique vegni tegnì quint dal grond basegn da pudair votar ed eleger a temp, independentamain da la posta estra.

Il vote électronique dals chantuns Argovia, Grischun e Son Gagl sa basa – en il rom d'in consorzi – sin ina copia dal sistem da vote électronique dal chantun Turitg. Il chantun Basilea-Citad applitgescha il sistem da Genevra. En Svizra vegnan utilisadas trais soluziuns d'informatica per il vote électronique (sistems dals chantuns Genevra, Neuchâtel e Turitg).


Infurmaziuns:
Walter Frizzoni, vicechancelier, chanzlia chantunala dal Grischun, tel. 081 257 22 22


Gremi: chanzlia chantunala dal Grischun
Funtauna: rg chanzlia chantunala dal Grischun