En la procedura da concurs èn las installaziuns da la resgia a Domat vegnidas vendidas oz glindesdi (27 da zercladur 2011) tras ingiant a la Klausner Holz Thüringen GmbH. Perquai ch'il cumprader prevesa da transportar davent las maschinas, vegn la resgia demontada definitivamain. Entaifer l'economia forestala dal Grischun han las activitads exemplaricas per pussibilitar la cuntinuaziun dal manaschi da la resgia fullà novas vias per collavuraziuns tranter las branschas. A chaschun d'ina conferenza da medias a Cuira han las represchentantas ed ils represchentants da las branschas, dal lieu e dal chantun infurmà davart las novaziuns ch'ins ha cuntanschì cun quest sforz singular.

Entaifer bundant 6 emnas han vischnancas, proprietarias e proprietaris da guaud, impressaris forestals e commerziants da laina dal chantun Grischun garantì ad in investider pussaivel passa 150'000 meters cubic laina radunda per 10 onns. Tenor in model da pretsch modern per la branscha avessan duì vegnir gulivadas instabilitads dals pretschs e vegnir garantida la cultivaziun persistenta da laina sco materia prima, e quai en buns sco er en nauschs temps. "Il basegn da las proprietarias e dals proprietaris da guaud da calmar il martgà da laina incalculabel è grond", ha declerà Andrea Florin, il president da la federaziun forestala SELVA. "Novs mecanissems per furmar ils pretschs tar l'utilisaziun da laina pudessan midar la relaziun da partenadi tranter las proprietarias ed ils proprietaris da guaud e las resgias. Quai avain nus cumprovà en quest project singular per tut l'Europa", uschia Florin. La prontezza da tut las parts participadas da s'adattar e da s'integrar per cuntanscher ina gronda finamira al hajan impressiunà, ha ditg il selvicultur chantunal Reto Hefti. Las novaziuns che resultan dal project èn tenor Hefti valurs durablas che vegnan ad esser d'avantatg per il svilup futur.

Prestaziun da piunier metta novs accents
Er sche l'elavuraziun da laina n'è betg pli pussaivla en la resgia a Domat, ha l'acziun da pliras branschas rendì conscienta ina finamira centrala da la selvicultura. Sco ch'il cusseglier guvernativ Mario Cavigelli (departament da construcziun, traffic e selvicultura) ha explitgà, ha la discussiun publica en connex cun ils contracts da furniziun novs mussà l'impurtanza da la tgira dal guaud ed il problem dals gronds custs da cultivaziun. "La prestaziun da piunier da las proprietarias e dals proprietaris da guaud sco er da las organisaziuns da commerzialisaziun ha focussà novas forzas per la cultivaziun dal guaud en il chantun Grischun, las qualas vegnan mantegnidas er senza la resgia. Cun la proxima revisiun totala da la lescha dal guaud mettain nus novs accents er en il sectur giuridic per meglierar las structuras ch'èn necessarias en la selvicultura", uschia Cavigelli.

Las vischnancas ed il chantun examineschan il svilup dal lieu
Beatrice Baselgia, deputada e presidenta communala da Domat, ha declerà il glindesdi saira che la vischnanca da Domat examineschia ussa ensemen cun la proprietaria dal terren (la vischnanca burgaisa da Domat) e cun il chantun Grischun utilisaziuns futuras pussaivlas da l'areal. La fin dal chapitel resgia gronda fetschia libra la via a Domat per in nov svilup empermettent d'in lieu cun in access excellent.


Infurmaziuns:
cusseglier guvernativ dr. Mario Cavigelli, schef dal departament da construcziun, traffic e selvicultura dal Grischun, tel. 081 257 36 01


Gremi: departament da construcziun, traffic e selvicultura
Funtauna: rg departament da construcziun, traffic e selvicultura