En il rom da la sanaziun da la Scola chantunala Cuira è vegnì eruì il victur da la concurrenza da projects per ils bajetgs d’amplificaziun che cumpiglian la medioteca, la mensa e stanzas d’instrucziun. Dals totalmain 39 concurrents han ins elegì il project "DENYS" da l’architect Andy Senn, Son Gagl. Quest project duai vegnir sviluppà vinavant.

La davosa etappa da construcziun da la sanaziun cumenzada il 2006 cun la renovaziun da la Canti Halde cumpiglia bajetgs cumplementars cun ina medioteca, ina mensa, sco er stanzas d’instrucziun e locals per la protecziun da bains culturals. Questas localitads duain vegnir realisadas sco edifizis novs al Münzweg.

La regenza ha approvà il program da spazi ils 26 d’october 2010 ed ha incaricà il departement da construcziun, traffic e selvicultura d’elavurar la basa da decisiun per ina proposta da credit per mauns dal cussegl grond.

L’Uffizi da construcziun auta dal Grischun ha sinaquai publitgà il schaner 2011 ina concurrenza per obtegnair skizzas per il project da construcziun.

La concurrenza aveva la finamira da chattar in project che ademplescha tut las pretensiuns da manaschi, che sa lascha realisar a moda persistenta e bunmartgada e che sa distingua cun ina buna qualitad architectonica. Il plazzal che sa chatta en la vischinanza immediata dal bogn avert Sand pussibilitescha er da nizegiar sinergias tranter la mensa ed il kiosc dal bogn. Sin giavisch da la citad da Cuira han ins incaricà ils participants da la concurrenza d’elavurar schliaziuns pussaivlas en quest connex.

La giuria, ch’è vegnida convotgada per trais dis durant il mais da zercladur 2011, ha pudì valitar 39 projects. Sin fundament da sias qualitads puncto manaschi, architectura ed economia ha la giuria premià cun l’emprim rang e recumandà da sviluppar vinavant il project "DENYS" da l’architect Andy Senn (Collavuraturs: Antje Wanner, Deborah Weber), Son Gagl.

Il rapport da la giurià è da chattar sut www.hochbauamt.gr.ch  

Exposiziun dals projects da la concurrenza
Ils projects da la concurrenza vegnan exponids ils sequents dis en la veglia halla da gimnastica Sand a la St. Luzistrasse 14, 7000 Cuira:  

mesemna	6 da fanadur 2011	17.00 fin 19.00 uras
gievgia	7 da fanadur 2011	17.00 fin 19.00 uras
venderdi	8 da fanadur 2011	17.00 fin 19.00 uras
sonda	9 da fanadur 2011	10.00 fin 14.00 uras
glindesdi	11 da fanadur 2011	17.00 fin 19.00 uras
mardi	12 da fanadur 2011	17.00 fin 19.00 uras
mesemna	13 da fanadur 2011	17.00 fin 19.00 uras
gievgia	14 da fanadur 2011	17.00 fin 19.00 uras
venderdi	15 da fanadur 2011	17.00 fin 19.00 uras
sonda	16 da fanadur 2011	10.00 fin 14.00 uras

L’avertura da l’exposiziun ha lieu mesemna, ils 6 da fanadur 2011 a las 16.30.


Persuna da contact:
Markus Dünner, architect chantunal, Uffizi da construcziun auta, tel.: 081 257 36 31


Gremi: uffizi da construcziun auta Grischun
Funtauna: rg uffizi da construcziun auta Grischun