En in'emprima etappa prevesa il chantun Grischun da reunir a Cuira vest ina part da l'administraziun ch'è gia oz domiciliada a Cuira en in edifizi nov cun 400 plazzas da lavur. La regenza vul uschia reducir ils custs currents, trair a niz meglier las sinergias ed optimar ils andaments. En connex cun l'avertura dal center d'administraziun "sinergia" fa il chantun quint a partir da l'onn 2016 cun respargns annuals periodics en la dimensiun da milliuns. La regenza ha deliberà la missiva correspundenta per mauns dal cussegl grond. Sch'il parlament conceda en la sessiun d'october il credit d'impegn necessari da 69 milliuns francs, po il project vegnir suttamess a las votantas ed als votants dal Grischun per la votaziun il mars 2012.

Strategia chantunala d'immobiglias cun centers regiunals ferms
L'installaziun d'in center d'administraziun a Cuira fa part da la strategia chantunala d'immobiglias. Quella prevesa da furmar totalmain nov centers regiunals ferms e d'als repartir sin l'entir chantun. Cun la concentraziun, cun ils standards moderns da las localitads sco er cun las ulteriuras mesiras pon vegnir realisads en moda durabla reducziuns da las surfatschas relevantas per ils custs ed in meglier niz per la clientella. A Glion ed a Roveredo ha il chantun gia fusiunà cun success. A Tusaun po l'edifizi regiunal d'administraziun vegnir retratg il settember 2011. A Scuol, a Tavau ed a Landquart è previsa l'avertura per la fin da l'onn 2013 u per il cumenzament da l'onn 2014. Er a Samedan, a Puschlav ed a Cuira duain vegnir installads entaifer ils proxims onns centers administrativs. En la sessiun da december 2009 ha il cussegl grond prendì enconuschientscha da questa strategia d'immobiglias e decidì cun il consentiment da la gronda maioritad da realisar en etappas la varianta "sinergia" a Cuira.

L'administraziun chantunala è oz repartida sin 44 differents lieus a Cuira
A Cuira è la situaziun da las localitads spezialmain nuncuntentaivla. Repartida sin 44 edifizis na po l'administraziun chantunala a Cuira betg vegnir organisada en moda effizienta. Las immobiglias construidas oriundamain per gronda part per abitar lien èn adattadas mo cun resalvas per l'utilisaziun sco biros e chaschunan – sin fundament da las surfatschas da niz e da traffic ch'èn per part sproporziunadamain grondas – gronds custs da gestiun e da mantegniment. Immobiglias che han ina purschida disfavuraivla da spazi u che stuessan vegnir adattadas areguard l'architectura duain vegnir vendidas, sch'il chantun è proprietari, resp. desditgas, sch'il chantun è locatari.

Realisaziun dal project "sinergia" en etappas
Il concept "sinergia" planisà per il lieu d'administraziun Cuira prevesa da spustar tut en tut 670 plazzas da lavur a Cuira vest e duai vegnir realisà successivamain en dus pass separads. En l'emprima etappa da realisaziun preschentada en la missiva da la regenza duain ils posts da servetsch, nua ch'il basegn d'agir è il pli grond, vegnir spustads en in nov center d'administraziun cun var 400 plazzas da lavur a la Ring-/Salvatorenstrasse. Sa basond sin ils resultats d'ina planisaziun da test importan ils custs bruts per quest project da construir in edifizi nov en il standard MINERGIE-P-Eco® 69 milliuns francs. Suenter la deducziun dals retgavs da 21 milliuns francs che resultan da la vendita d'immobiglias restan investiziuns nettas da 48 milliuns francs per il chantun. Gia a partir da l'emprim onn da gestiun suenter la realisaziun da l'emprima etappa fa il chantun quint cun respargns annuals dad 1.2 fin 1.9 milliuns francs. Quels resultan da la reducziun da spazi cuntanschida sco er da l'optimaziun dals andaments interns.

Sch'il cussegl grond approvescha en la proxima sessiun d'october in credit d'impegn da 69 milliuns francs e sche las votantas ed ils votants dattan lur consentiment en la votaziun dal pievel il mars 2012, duai vegnir lantschada la stad 2012 ina concurrenza per eruir il project d'execuziun definitiv. Las prescripziuns tenor la planisaziun da test ston vegnir observadas. L'atun 2016 èsi previs da retrair il nov edifizi d'administraziun.

En ina segunda etappa, che sto puspè vegnir suttamessa al parlament ed al pievel avant la realisaziun, duain vegnir installadas ulteriuras 270 plazzas da lavur. Quellas èn medemamain situadas oz en edifizis betg adattads. Il basegn d'agir è dentant main urgent. Tenor ina stimaziun approximativa dals custs ston ins far quint cun investiziuns nettas da var 25 milliuns francs per la segunda etappa. Il termin il pli baud pussaivel per retrair l'edifizi d'engrondiment fiss l'onn 2021.

Suenter la realisaziun cumpletta dal project "sinergia" cun in spustament da totalmain 670 collavuraturas e collavuraturs a Cuira vest mantegnessan passa 500 emploiadas ed emploiads da l'administraziun chantunala lur plazza da lavur al lieu actual en il center da Cuira. Il project "sinergia" na prevesa ultra da quai ni in augment dal dumber total da collavuraturas e da collavuraturs ni in spustament da plazzas da lavur dals ulteriurs centers regiunals en la chapitala chantunala.

La citad da Cuira beneventa il center d'administraziun a Cuira vest
Tenor il cussegl da la citad da Cuira gida la construcziun d'in nov center d'administraziun a la Ring-/Salvatorenstrasse considerablamain a meglierar las structuras ed ad augmentar la valur da Cuira vest sco segund center da la citad. Perquai la beneventa la regenza da Cuira expressivamain. La domiciliaziun d'ina gronda part da l'administraziun en la vischinanza dals access a l'autostrada resp. da la fermada da Cuira vest è favuraivla areguard l'avertura e distgargia plinavant il traffic individual en il center da la citad en moda remartgabla.
 
La realisaziun en etappas permetta da sviluppar vinavant pass per pass il center da la citad e tegna ultra da quai quint dals interess dal mastergn e dal sectur d'immobiglias urban. Plinavant po il potenzial per nov spazi d'abitar en la vischinanza dal center da la citad vegnir tratg a niz cun vender las immobiglias che daventan libras.
 
L'utilisaziun optimada da las zonas d'abitar e dal center a Cuira na vegn betg ad avair consequenzas negativas per las interpresas da servetsch en il center da la citad. En l'emprima etappa vegnan spustadas mo 400 da las totalmain passa 25'000 plazzas da lavur da Cuira en in auter quartier da la citad. Quai correspunda ad ina quota da mo 1.6%. En ils edifizis che na vegnan betg duvrads per intents d'abitar vegnan domiciliadas previsiblamain autras plazzas da lavur.
 
Il settember 2009 han las votantas ed ils votants da Cuira approvà – en il rom da la revisiun parziala da la planisaziun urbana – cun passa 70% la midada da zona da l'areal da la caserna ch'è necessaria per realisar il center d'administraziun.

Dretgiras chantunalas sco utilisadras futuras da l'edifizi chantunal
En cas ch'il project general "sinergia" vegn realisà cumplettamain, duain la dretgira chantunala e la dretgira administrativa duvrar vinavant l'edifizi chantunal istoric a la Grabenstrasse, nua che sa chatta actualmain ina part da l'uffizi da construcziun bassa. Il vegl edifizi chantunal è gia l'ultim tschientaner stà duas giadas la sedia da la dretgira suprema. Suenter las lavurs da sanaziun necessarias pudess el vegnir retratg il pli baud l'onn 2023. En il rom d'ina decleraziun d'intenziun suttascritta ultimamain èn la regenza e las duas dretgiras sa cunvegnidas da proceder uschia.


Infurmaziuns:
- cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01
- Markus Dünner, architect chantunal, uffizi da construcziun auta dal Grischun,
tel. 081 257 36 31


Gremi: regenza
Funtauna: rg chanzlia chantunala dal Grischun