L'uffizi forestal dal Grischun (UF) mida ses num per il 1. d'avust 2011 en "uffizi da guaud e privels da la natira (UGP)". Questa nova denominaziun circumscriva meglier il champ d'incumbensas amplifitgà da l'uffizi e sia cumpetenza è cleramain visibla per persunas d'ordaifer.

Ils privels da la natira sco lavinas, crudada da crappa, auas grondas e bovas èn privels considerabels en il chantun Grischun. Il guaud da protecziun è la basa la pli impurtanta per la protecziun cunter privels da la natira. Da 180'000 hectaras guaud en il Grischun adempleschan 120'000 hectaras ina funcziun da protecziun. Quests guauds protegian abitadis, vias e viafiers. Rempars cunter lavinas, cunter crudada da crappa e cunter bovas vegnan realisads mo en quels lieus, nua ch'il guaud da protecziun na crescha betg u nua ch'el na po betg ademplir la funcziun da protecziun.

Nov num a partir dal 1. d'avust
Tant la tgira dal guaud da protecziun sco er ils rempars cunter privels da la natira èn fa­tschentas principalas da l'uffizi forestal (UF). Ils ultims diesch onns è vegnì etablì il sectur "privels da la natira" tar l'uffizi forestal e quest sectur è vegnì amplifitgà confurm als basegns. Circa la mesadad da la lavur operativa vegn impundida per la protecziun cunter privels da la natira. La fasa da prevenziun ed il giudicament dals privels da la natira èn chaussa da l'uffizi e da sias spezialistas e ses spezialists. Quest urden da cumpetenzas duai esser cleramain transparent tras ina nova denominaziun da l'uffizi en "uffizi da guaud e privels da la natira (UGP)" er per persunas d'ordaifer. Uschia èsi cleramain visibel – en cas da dumondas che arrivan d'ordaifer – ch'i dat in post da consultaziun per privels da la natira en l'administraziun chantunala. La nova denominaziun che vala a partir dal 1. d'avust 2011 circum­scriva èn moda pli correcta il champ d'incumbensas da l'uffizi ch'è vegnì amplifitgà en il fratemp.

Per la segirezza cunter privels da la natira restan responsabels sin plaun chantunal er vinavant differents posts da servetsch e differents acturs. Els persequiteschan tuts la finamira communabla da sustegnair las vischnancas en ina stretga collavuraziun e cun ina clera repartiziun da las rollas. L'uffizi da guaud e privels da la natira sa dat la finamira da metter a disposiziun ina buna basa a las vischnancas ed a la publicitad en l'internet sut www.wald-naturgefahren.gr.ch. Ensemen cun ils selviculturs da revier al lieu vegnan furnids uschia servetschs optimals en cas da privels da la natira.


Infurmaziuns:
- Reto Hefti, selvicultur chantunal, uffizi da guaud e privels da la natira, tel. 081 257 38 51


Gremi: uffizi da guaud e privels da la natira
Funtauna: rg uffizi da guaud e privels da la natira