La regenza grischuna ha concludì che cartas d'identitad pon vegnir retratgas en l'avegnir er tar la vischnanca. Tgi che dovra ina carta d'identitad na sto betg pli ir obligatoricamain tar il center chantunal da documents d'identitad. Plinavant ha la regenza deliberà las missivas tar duas fusiuns da vischnancas.

Cartas d'identitad pon vegnir retratgas en il futur er tar la vischnanca
Cartas d'identitad pon vegnir retratgas en il futur tar las vischnancas sco er directamain tar ils centers chantunals da documents d'identitad. Sco che la regenza ha decidì renunzia ella per entant d'avrir ulteriurs centers da documents d'identitad en il Grischun.

Oriundamain èsi sta previs d'installar pass per pass tschintg centers da documents d'identitad en il chantun Grischun. Tenor la lescha federala davart ils documents d'identitad da las burgaisas e dals burgais svizzers (lescha davart ils documents d'identitad) ch'è stada planisada e ch'è – suenter la votaziun dal pievel – entrada en vigur per il 1. da mars 2010 èn ils chantuns stads obligads d'adattar la procedura per dumandar ina carta d'identitad fin la fin da favrer 2012. Il pli tard a partir da quest mument avessan las cartas d'identitad er stuì vegnir dumandadas sur ils centers da documents d'identitad.

Tenor la lescha davart ils documents d'identitad gia revedida che entra en vigur probablamain l'onn 2012 n'èn ils chantuns però betg pli obligads d'adattar la procedura per dumandar ina carta d'identitad. Tras la revisiun da la lescha èsi vegnì fixà che las burgaisas ed ils burgais pon dumandar er vinavant cartas d'identitad senza datas biometricas.
Sa basond sin la nova situaziun giuridica s'exprima la regenza cunter ina monopolisaziun da la procedura d'emissiun da cartas d'identitad en ils centers da documents d'identitad. E sco che las experientschas ch'èn vegnidas fatgas fin ussa mussan pon ils basegns actuals da la populaziun grischuna vegnir satisfatgs fitg bain cun ils dus centers da documents d'identitad ch'existan en il chantun.

Missivas tar duas fusiuns da vischnancas
La regenza grischuna suttametta al cussegl grond ina missiva concernent la fusiun da las vischnancas dad Igis e da Mastrils a la vischnanca da Landquart. Ils 15 da matg 2011 avevan las vischnancas dad Igis e da Mastrils mintgamai approvà la fusiun a la nova vischnanca da Landquart. Silsuenter ha la regenza approvà ina cunvegna correspundenta. Suenter l'approvaziun tras il cussegl grond vegn la fusiun ad entrar en vigur per il 1. da schaner 2012.

In'ulteriura missiva al cussegl grond cuntegna la fusiun da las vischnancas da Schlans e da Trun a la vischnanca da Trun. Ils 16 d'avrigl 2011 resp. ils 15 da matg 2011 avevan las vischnancas da Schlans e da Trun mintgamai approvà la fusiun a la nova vischnanca da Trun. Er qua ha la regenza approvà silsuenter ina cunvegna correspundenta. Suenter l'approvaziun tras il cussegl grond entra la fusiun en vigur er per il 1. da schaner 2012.

Da vischnancas e da regiuns

• Alvaschagn: La revisiun totala da la planisaziun locala, concludida da la vischnanca dad Alvaschagn ils 17 da december 2010, vegn approvada.
• Andiast: La revisiun parziala da la planisaziun locala ch'è vegnida concludida da la vischnanca dad Andiast ils 15 d'avrigl 2011 e che cumpiglia in plan da zonas 1:2'000 territori "Resgia" vegn approvada.
• Bravuogn: Il project "Via da guaud Zinols – Crestota – God d’Urmena" da la vischnanca da Bravuogn vegn approvà. Als custs da 145'000 francs vegn garantida ina contribuziun da maximalmain 87'000 francs.
• Bregaglia: Il project "Avertura Pign Scür e Val Gaita" da la vischnanca da Bregaglia vegn approvà. Als custs da 155'000 francs vegn garantida ina contribuziun da maximalmain 99'200 francs.
• Tavau: La revisiun parziala da la planisaziun locala ch'è vegnida concludida da las votantas e dals votants da la vischnanca da Tavau a chaschun da la votaziun communala dals 13 da favrer 2011 e che cumpiglia in plan da zonas parzial 1:1'000 "Seehöhe Tschuggen" vegn approvada.
• Schlans: La revisiun parziala da la planisaziun locala ch'è vegnida concludida da la vischnanca da Schlans a la radunanza communala dals 18 da mars 2011 e che cumpiglia ina revisiun parziala da la lescha da construcziun vegn approvada.
• Schluein: La revisiun parziala da la planisaziun locala ch'è vegnida deliberada da la vischnanca da Schluein a la radunanza communala dals 6 d'avrigl 2011 e che cumpiglia in plan da zonas e plan general da furmaziun 1:2'000 lavuratori da l'implant da golf vegn approvada.
• Scuol: La revisiun parziala da la planisaziun locala, concludida da la vischnanca da Scuol a chaschun da la votaziun a l'urna ils 12 da december 2010, vegn approvada.

Projects da vias
La regenza ha approvà 2'100'000 francs per construir e per sanar il suandant traject da via:
- via da Maladers: lavurs d'impressari en il vitg da Maladers


Gremi: regenza
Funtauna: rg chanzlia chantunala dal Grischun