Ina revisiun totala da la lescha chantunala davart il guaud duai simplifitgar l'organisaziun da la selvicultura. En il futur duain ils purtaders dals reviers vegnir indemnisads – en il rom da cunvegnas – per lur prestaziuns a favur da la publicitad.

La legislaziun chantunala forestala vertenta che datescha da l'onn 1996 è da princip sa cumprovada. Pervia da las midadas ch'han gì lieu en il fratemp e pervia da novs basegns ch'èn sa manifestads duai ella dentant vegnir adattada e structurada da nov.

Structuras pli concisas, novas cunvegnas
La finamira principala dal project è quella da simplifitgar las structuras en il sectur da l'organisaziun forestala. Per mintga revier forestal paja il chantun oz ina contribuziun da 15 pertschient vi da la paja d'ina selvicultura u d'in selvicultur da revier, e quai per prestaziuns a favur da la generalitad, sco per exempel per la surveglianza dal guaud da protecziun, per mesiras en l'interess da la biodiversitad e per la protecziun forestala sco er per activitads che servan a garantir la qualitad e che stattan en connex cun la cultivaziun dal guaud. Ils purtaders dals reviers vegnan ad observar er en il futur las incumbensas da surveglianza, da controlla e d'execuziun en la dimensiun da fin ussa. Da nov vegn dentant fatga l'indemnisaziun en il rom da cunvegnas da prestaziun tranter il chantun ed ils purtaders dals reviers. Quests purtaders survegnan ina contribuziun da basa ed ina indemnisaziun che sa referescha a la prestaziun. Cun la contribuziun da basa vegnan indemnisadas las prestaziuns obligatoricas en furma d'ina pauschala dependenta da la surfatscha (surfatscha da guaud). Incumbensas sco per exempel la tgira e l'utilisaziun dal guaud sco er la cussegliaziun da persunas che possedan in guaud privat vegnan indemnisadas en moda dependenta da la prestaziun. Questas incumbensas e l'indemnisaziun correspundenta vegnan descrittas e fixadas en cunvegnas da prestaziun respectivas.

Cun abolir las contribuziuns linearas vegnan eliminads impuls franants, cunzunt en vista a fusiuns da vischnancas. Reviers forestals gronds cun blera utilisaziun da laina survegnan en il futur plinavant contribuziuns pli autas che reviers pli pitschens cun pauca utilisaziun da laina.

La regenza grischuna ha dà liber la consultaziun fin ils 15 da november 2011. Ils documents da consultaziun pon vegnir chargiads giu da l'internet sut www.bvfd.gr.ch u pon vegnir empustads tar il departament.

Infurmaziuns:
- cusseglier guvernativ Mario Cavigelli, schef dal departament da construcziun, traffic e selvicultura, tel. 081 257 36 01
- Reto Hefti, selvicultur chantunal, telefon 081 257 38 51

Gremi: regenza
Funtauna: rg chanzlia chantunala dal Grischun