Ils dis europeics dal monument, che han lieu ils 3 ed ils 4 da settember 2011, porschan in program multifar er en il Grischun.

Mintga onn envidan ils dis europeics dal monument da far viadis d'exploraziun tar noss bains culturals. La 18. realisaziun stat en tut la Svizra sut il motto "Il mund sutterran" e sa concentrescha sin construcziuns sutterranas. La tgira da monuments dal Grischun e la protecziun da la patria dal Grischun porschan ensemen in ritg program. Ellas han dentant extendì il tema e vulessan manar las aspectaturas ed ils aspectaturs ad objects zuppads e nunenconuschents. Il lieu da realisaziun è Cuira, nossa chapitala. Tut las persunas interessadas èn envidadas l'emprima fin d'emna dal settember da visitar e d'emprender ad enconuscher monuments culturals ch'ellas n'enconuschan anc betg.

Ils dis dal monument vegnan averts uffizialmain sonda, ils 3 da settember 2011, a las 13.30 sin il Martinsplatz a Cuira da Doris Caviezel-Hidber, cussegliera da la citad, da Michael Meier, directur da Cuira turissem, dad Inge Beckel, presidenta da la protecziun da la patria dal Grischun e da Marcus Casutt, tgirader chantunal da monuments. Sonda, ils 3 da settember, da las 14.15 fin las 17.00, sco er dumengia, ils 4 da settember, da las 10.30 fin las 16.30, han lieu a Cuira numerusas visitas guidadas e visitaziuns da lieus ils pli differents da la citad veglia, da baselgias e da chasas privatas.

La glista da las singulas occurrenzas sco er infurmaziuns detagliadas pon vegnir consultadas en l'internet sut www.denkmalpflege.gr.ch u sut www.hereinspaziert.ch. Attenziun: Entant ch'ils dis europeics dal monument han lieu en auters lieus da la Svizra ils 10 ed ils 11 da settember, sto questa occurrenza vegnir realisada a Cuira in'emna pli baud.

Per in vast public
Dapi sia emprima realisaziun l'onn 1994 èn ils dis europeics dal monument sa sviluppads a l'occurrenza la pli gronda en il sectur da la sensibilisaziun per il mantegniment da bains culturals. L'occurrenza ha la finamira da svegliar tar in vast public l'interess per ils bains culturals e per lur mantegniment. Las visitas vegnan organisadas en emprima lingia dals posts spezialisads federals, chantunals e municipals per la tgira da monuments e per l'archeologia. Els tschernan mintga onn ils objects, contacteschan las proprietarias ed ils proprietaris ed organiseschan ils guids e las occurrenzas al lieu.

Il center naziunal d'infurmaziun per il mantegniment dals bains culturals (NIKE) è responsabel per la coordinaziun da las var 200 occurrenzas en l'entira Svizra, per la lavur naziunala da medias e da publicitad sco er per la publicaziun dal program en furma da broschura ed en l'internet. Ils dis europeics dal monument èn ina manifestaziun culturala che vegn lantschada uffizialmain dal cussegl da l'Europa. Els vegnan er sustegnids da l'uniun europeica. Ils dis dal monument han lieu en 48 pajais europeics.


Infurmaziuns:
Marcus Casutt, tgirader chantunal da monuments, tel. 081 257 27 91


Gremi: uffizi da cultura
Funtauna: rg uffizi da cultura