La regenza grischuna beneventa ina cooperaziun cun il chantun Glaruna en connex cun ils servetschs dal medi chantunal. En sia ultima sesida ha la regenza grischuna plinavant tractà differentas fatschentas da vischnancas e da regiuns e concedì contribuziuns a projects da vias.
Il medi chantunal grischun s'occupa da nov er da Glaruna
A partir dal 1. da schaner 2012 è il medi chantunal grischun cumpetent er per il chantun Glaruna. Sin dumonda dal chantun Glaruna ha la regenza grischuna acceptà da surpigliar las incumbensas dal medi chantunal, ed ella ha autorisà la scheffa dal departament da giustia, segirezza e sanadad da suttascriver ina cunvegna interchantunala correspundenta.
Il pensum da lavur dal medi chantunal glarunais importa circa 30 pertschient d'in pensum cumplain. Per l'incumbensa dal medi chantunal en il Grischun stat a disposiziun oz ina mesa plazza (50 pertschient). Il grad d'occupaziun importa dentant 70 pertschient. Tras la cooperaziun cun il chantun Glaruna vegn la plazza dal medi chantunal grischun, che appartegna a l'uffizi da sanadad, auzada per il 1. da schaner 2012 ad in pensum cumplain (100 pertschient). Da quai èn reservads 30 pertschient per il servetsch dal medi chantunal da Glaruna. Il chantun Glaruna sa participescha en questa dimensiun al pajament dal salari plus als custs per las contribuziuns a l'assicuranza sociala. Er l'infrastructura da biro vegn messa a disposiziun a Glaruna.
Las incumbensas dal medi chantunal vegnan surdadas al Grischun, perquai ch'il medi chantunal glarunais actual vegn pensiunà. Da la fusiun s'empermettan omadus chantuns in'occupaziun optimada dals dus servetschs. Effects positivs vegn er ad avair il barat d'experientschas e d'infurmaziuns. Plinavant resultan sinergias areguard la scolaziun ed areguard la participaziun a dietas.
Da vischnancas e da regiuns
- Trin: Il project "Protecziun cunter crudada da crappa a Porclis" da l'uffizi da construcziun bassa dal Grischun sin il territori da la vischnanca da Trin vegn approvà.
- Riein/Pitasch/Sevgein: Il project da via "Rempar Val Renastga" cun las vischnancas pertutgadas da Riein, da Pitasch e da Sevgein vegn approvà (vesair l'alinea "Projects da vias").
Projects da vias
La regenza ha approvà totalmain 2'460'000 francs per construir e per sanar ils suandants trajects da vias:
- via naziunala A28: lavurs d'impressari, punt dal Trockenbach, access da Landquart – Claustra Selfranga
- via da Val S. Pieder: lavurs d'impressari, Val Renastga
Gremi: regenza
Funtauna: rg chanzlia chantunala dal Grischun