La regenza a las abitantas ed als abitants dal chantun Grischun

Stimadas conburgaisas e stimads conburgais

Mintga onn, la terza dumengia da settember, celebrain nus la rogaziun federala. Igl è tradiziun che la regenza redigia per quest firà in uschenumnà mandat da la rogaziun federala. En in temp, nua ch’i vegn discurrì da crisas da las instituziuns e nua che schizunt represchentantas e represchentants da las baselgias chantunalas pensan dad aut da renunziar a colliaziuns ecclesiasticas statalas, dastga e sto er vegnir reflectada en moda critica la tradiziun dal mandat da la rogaziun federala.
Catastrofas da la natira, la midada dal clima, insolvenzas da stadis smanatschantas, revoluziuns economicas, structuralas e socialas, la transfurmaziun svelta da tecnologias, polarisaziuns politicas: dapertut sentan ins malsegirezzas, er sch'ellas vegnan zuppentadas da decleraziuns fatgas dad aut ch'èn da curta durada mediala. En tals conturns pon las tradiziuns dar sustegn.
Perquai è er la festa da la rogaziun federala actuala pli che mai:

Engraziament
Per il filosof roman Cicero è l'engraziaivladad la premissa per l'armonia tranter ils umans. Viver ensemen cun umans malengraziaivels n'è insumma betg simpel. Nus avain avunda raschuns dad esser engraziaivels. Engraziaivels dad esser schanegiads da guerras e da catastrofas da la natira. Engraziaivels da dastgar viver en in sistem politic che sa basa sin giustia e sin correctadad. L'engraziaivladad è la basa da l'amur per il proxim sco er da la solidaritad. Quella caracterisescha l'uman, dat in senn a la vita e represchenta la funtauna da la pasch. Forsa fissi cunvegnent d’endrizzar mintgatant ultra da fabricas da reflexiun er fabricas d’engraziament.
Sco Grischunas e Grischuns essan nus engraziaivels per la solidaritad che vegn adina puspè exprimida envers chantuns da muntogna; sco Svizras e Svizzers essan nus engraziaivels per il bun standard da nossas ovras socialas; sco persunas che vivan en il center da l'Europa essan nus – betg mo durant l'onn europeic da la lavur voluntara – engraziaivels per las numerusas uras prestadas voluntarmain.
L’engraziaivladad metta cunfins a la tenuta privlusa da far pretensiuns ed impedescha che l'amur per il proxim sco er la solidaritad vegnian malduvradas e surstrapatschadas.

Penetienza
Mintga uman è responsabel per l’entir. L’agir da mintgin ha effects per l’entir mund. Da quai n’essan nus betg adina conscients. Mintgatant stgatschain nus pli gugent quest fatg. Da temp en temp èsi perquai necessari da tschertgar quietezza e da vegnir conscient da la responsabladad. Nus na valitain betg adina endretg la responsabladad envers noss conumans.

Uraziun
Da l’engraziament e da la penetienza resulta l’uraziun atgnamain da sasezza. L’uraziun rinforza nossa confidenza da betg esser surlaschads a nus sez e cumbatta la malsegirezza da dadens anora. Che er la politica sa renda conscienta mintga onn dal cuntegn da la rogaziun federala sa cunvegn bain per ella. La confruntaziun cun il cuntegn da la rogaziun federala n’è betg nova; ella è dentant actuala pir che mai.
Cun quests patratgs giavischain nus a Vus, charas conburgaisas e chars conburgais, ina rogaziun contemplativa ch’è purtada d’engraziaivladad e da confidenza.

Cuira, settember 2011

En num da la regenza
Il president: dr. Martin Schmid
Il chancelier: dr. Claudio Riesen