La regenza ha surdà il premi grischun da cultura 2011 a Gion A. Caminada. A medem temp ha ella concedì premis da renconuschientscha respectivamain da promoziun a 18 persunas che lavuran sin il champ cultural. Ultra da quai ha la regenza grischuna constatà en sia ultima sesida che l'iniziativa chantunala dal pievel "Per elecziuns gistas" è reussida cun 4'088 suttascripziuns valaivlas.

Gion A. Caminada survegn il premi da cultura 2011
La regenza ha surdà il premi grischun da cultura 2011 sco er otg premis da renconuschientscha e diesch premis da promoziun. Il purtader dal premi grischun da cultura 2011 sa numna Gion A. Caminada. Cun la surdada dal premi undrescha la regenza sia lavur en il sectur da l'architectura renconuschida sin plaun internaziunal. Sia architectura cumbinescha la moda da construcziun rurala da sia patria grischuna cun novas modas da construcziun e da producziun. En il dialog tranter las scienzas da cultura, l'economia, la politica, il mastergn, la tecnica ed autras disciplinas concepescha ella ultra da quai lieus d'auta sensualitad. Il premi è dotà cun 30'000 francs.

In premi da renconuschientscha da mintgamai 20'000 francs survegnan:
Agnes Byland, Reto Crameri, Rudolf Fontana, Luigi Giacometti, Duri Janett, Hansmartin Schmid, Gioni Signorell e Thomas Zindel.
- Agnes Byland survegn il premi en appreziaziun da sia lavur durant blers onns sco pedagoga da musica, violinista e manadra d'orchesters d'uffants e da laics.
- Reto Crameri vegn undrà per sia perscrutaziun decisiva e renconuschida sin plaun internaziunal en il sectur da l'allergologia.
- Rudolf Fontana survegn il premi per sia lavur sco architect en il sectur dal svilup precaut d'edifizis novs ed en la confruntaziun intensiva cun la restauraziun d'impurtantas ovras da construcziun grischunas.
- Luigi Giacometti vegn undrà en renconuschientscha da ses engaschament per mantegnair e per promover il dialect da la Bregaglia.
- Duri Janett survegn il premi per sias prestaziuns sco pedagog da musica e dirigent da chors e da musicas instrumentalas sco er sco cornettist dals Fränzlis da Tschlin.
- Hansmartin Schmid survegn il premi en appreziaziun da sia activitad multifara sco scriptur e sco schurnalist, en spezial sco observatur critic dals eveniments en il Grischun.
- Gioni Signorell vegn undrà per sia lavur sco architect sco er per sia activitad sco pictur e sculptur.
- Thomas Zindel vegn undrà per sia lavur creativa consequenta sco er per sias culissas impressiunantas.

In premi da promoziun da mintgamai 20'000 francs survegnan: Markus Bernhard, musicist, Flurin Caduff, chantadur, Nyna Cantieni, chantadura, Duri Collenberg, musicist, Selina Derungs, musicista, José Federspiel, artist da multimedia, Pascal Hofmann, cineast, Magdalena Nadolska, teatrista, Lorenzo Polin, actur, sco er Colin Schaelli, designer.
Ils premis vegnan surdads en il rom d'ina festa che ha lieu venderdi, ils 11 da november 2011, a las 17.15 en la sala dal cussegl grond a Cuira.

L'iniziativa chantunala dal pievel "Per elecziuns gistas" è reussida
L'iniziativa chantunala "Per elecziuns gistas" è reussida cun 4'088 suttascripziuns valaivlas. Quai ha constatà la regenza grischuna. L'iniziativa dal pievel, inoltrada ils 26 d'avust 2011, è vegnida redigida sco iniziativa constituziunala en furma d'in sboz elavurà.
Resguardond ils termins legals vegn l'iniziativa surdada a la chanzlia chantunala per l'ulteriura elavuraziun en il rom dals conclus da princip da la regenza.

Passa 2 milliuns francs per la tgira d'uffants cumplementara a la famiglia
L'onn proxim sustegna la regenza grischuna la tgira d'uffants cumplementara a la famiglia cun totalmain 2'122'047 francs.
Ils custs normads fixads da la regenza per purschiders da la tgira d'uffants cumplementara a la famiglia che han il dretg da survegnir contribuziuns importan l'onn 2012 9.05 francs per ura da tgira e per uffant. 487 plazzas d'in entir onn èn vegnidas renconuschidas sco subvenziunablas. I vegn fatg quint cun tut en tut 1'118'032 uras subvenziunablas. Per ils emprims 3 onns importa la tariffa da contribuziun dal chantun per purschidas novas da la tgira d'uffants cumplementara a la famiglia 25 pertschient dals custs normads. Per tut las ulteriuras purschidas importa questa tariffa 20 pertschient dals custs normads. L'onn proxim vegnan purschidas novas sustegnidas cun 492'046 francs, purschidas existentas survegnan totalmain 1'630'001 francs (contribuziun totala: 2'122'047 francs).

Ordinaziun davart la planisaziun dal territori per simplifitgar il dretg da construcziun
La regenza ha approvà ina revisiun parziala da l'ordinaziun davart la planisaziun dal territori. La revisiun vul realisar la cunvegna interchantunala davart l'armonisaziun da la terminologia da construcziun (CIAC). Las vischnancas dal Grischun vegnan obligadas da resguardar la CIAC en lur legislaziun da construcziun communala. La finamira èsi d'unifitgar la terminologia da construcziun e da simplifitgar uschia il dretg da construcziun. Realisond la CIAC vegn ademplida ina incarica da la revisiun totala da la legislaziun chantunala davart la planisaziun dal territori ch'è entrada en vigur il 1. da november 2005.

La lavur da polizia na duai betg vegnir engrevgiada tras novas disposiziuns
En ina resposta da consultaziun a la confederaziun prenda la regenza grischuna posiziun davart il sboz preliminar da la cumissiun dal cussegl naziunal per dumondas giuridicas. Quel cuntegna la realisaziun d'ina iniziativa parlamentara che vul precisar il champ d'applicaziun da las disposiziuns davart l'investigaziun secreta. D'ina vart duai il cudesch da procedura penala svizzer definir cleramain, tge mesiras d'investigaziun che tutgan tar l'investigaziun secreta. Da l'autra vart duai vegnir stgaffida ina basa legala per acts d'investigaziun main rigurus sco la retschertga secreta.
En sia resposta da consultaziun è la regenza da l'avis ch'il basegn d'agir saja avant maun, tant pli che la dumonda, cura ch'ins discurra d'ina investigaziun secreta e cura d'ina retschertga secreta, possia chaschunar problems da cunfinaziun. Sut tschertas circumstanzas pudess numnadamain in'uschenumnada retschertga secreta vegnir taxada pli tard sco investigaziun secreta. Sch'ina permissiun giudiziala manca, na fissan las cumprovas chattadas uschia betg utilisablas. Areguard la regulaziun legala da la retschertga secreta è la regenza dentant da l'avis da mussar tschertas retegnientschas. Ins sto impedir che la polizia chantunala haja en l'avegnir, exequind sias activitads polizialas normalas, lavur e custs administrativs considerabels. Per la regenza fissi perquai d'examinar, sch'i na bastass betg da precisar sulettamain l'investigaziun secreta en ina lescha.


Da vischnancas e da regiuns

• Domat: A la vischnanca da Domat vegn garantida ina contribuziun pauschala da 590'000 francs per sanar e per engrondir la chasa da scola Tuma Platta. 
• Maladers: La revisiun parziala da la constituziun communala da la vischnanca da Maladers dals 23 da zercladur 2011 vegn approvada. 
• Tenna: La revisiun totala da la planisaziun locala, concludida da la vischnanca da Tenna ils 7 da favrer 2011, vegn approvada.

Gremi: regenza
Funtauna: rg chanzlia chantunala dal Grischun