La regenza ha permess da cuntinuar cun la nova instrucziun da linguas estras al stgalim da la scola primara, e quai cun midar successivamain ils uraris. Plinavant ha ella prendì posiziun tar la revisiun da la lescha federala davart las professiuns medicinalas.

A partir da l'onn da scola 2013/14 vegnan instruidas tut las classas da scola primara tenor ils novs uraris
Cun introducir l'englais e cun anticipar l'instrucziun d'ina lingua estra chantunala ha la regenza adattà l'urari dal stgalim primar per l'onn da scola 2010/11. Perquai ch'igl era – en vista a la midada – in giavisch, da betg confruntar cun las novas regulaziuns quellas classas che avevan gia cumenzà l'instrucziun da linguas estras tenor ils uraris existents, valevan ils novs uraris mo per las scolaras e per ils scolars da la 1. fin 3. classa. Ussa poi vegnir cuntinuà cun la midada: La regenza grischuna ha concludì ch'ils novs uraris duain vegnir applitgads pass per pass en il decurs dals proxims onns er en las classas superiuras da la scola primara, uschia ch'els èn, a partir da l'onn da scola 2013/14, finalmain en vigur per tur las sis classas dal stgalim primar.

La nova lescha davart las professiuns medicinalas chaschuna custs supplementaras per ils chantuns
En la resposta da consultaziun a la confederaziun beneventa la regenza grischuna da princip la revisiun da la lescha federala davart las professiuns medicinalas. Cun la revisiun duain vegnir adattadas las finamiras da la scolaziun e da la furmaziun supplementara sco er la definiziun per pratitgar independentamain la professiun d'ina professiun medicinala universitara. Da nov duain ils chantuns examinar en atgna responsabladad professiunala – il mument ch'els concedan la permissiun per pratitgar la professiun en furma d'economia privata – sche la petenta u il petent dumogna ina lingua naziunala svizra. En sia posiziun renviescha la regenza grischuna al fatg, ch'i resultan custs supplementars considerabels, sch'ils chantuns ston examinar sco previs las enconuschientschas linguisticas en il rom da las dumondas per la permissiun da pratitgar la professiun tras persunas medicinalas.


Da vischnancas e da regiuns 

• Segl: La revisiun parziala da la planisaziun locala che cumpiglia il plan da zonas 1:1'000 Waldhaus da la vischnanca da Segl dals 26 d'avust 2011 vegn approvada. 
• Tschlin: Il project per la correcziun dals curs d'aua da la vischnanca da Tschlin concernent la revitalisaziun da l'En tar San Niclà-Strada vegn approvà. A la vischnanca da Tschlin vegn garantida ina contribuziun chantunala da maximalmain 132'000 francs.

Gremi: regenza
Funtauna: rg chanzlia chantunala dal Grischun