Per la segunda giada vegn gievgia, ils 10 da november 2011, realisà l'anteriur di da la figlia sco di naziunal da l'avegnir per mattas e per mats er en il chantun Grischun. Omaduas schlattainas èn envidadas da dar in sguard a la vita professiunala ritga e vasta e d'engrondir cun curaschi lur orizont da la tscherna professiunala.

"Jau hai tut las schanzas" e "Mattas e mats han oz las medemas pussaivladads da scolaziun" – cur ch'i sa tracta da la tscherna da professiun da las persunas giuvnas, èn questas opiniuns fermamain derasadas. Ma sch'ins dat in sguard concret a las statisticas da scolaziun, è il maletg relativ: En il chantun Grischun èn sa concentradas l'onn passà 70% da las mattas sin 5 professiuns, tut professiuns socialas e communicativas. I na fa pia betg surstar, che bleras mattas n'han betg chattà ina plazza d'emprendissadi per la professiun giavischada e che 19% dad ellas ha stuì absolver in onn intermediar. Ils mats percunter han tschernì d'in spectrum professiunal bler pli vast, quasi tuts han chattà ina plazza d'emprendissadi, ma er els èn sa restrenschids en lur tscherna, en moda che la pli gronda part dad els è sa decidida per ina professiun tecnica u da mastergn. Cun excepziun da paucas professiuns che stevan libras ad omaduas varts, ha il mund da las professiuns anc fermamain ina structura bilaterala cun ina vart masculina ed ina vart feminina.

Il di da l'avegnir avra las portas: Mattas e mats èn envidads da far pass curaschus vers professiuns nunenconuschentas, ubain ensemen cun ina persuna da referenza creschida, en in manaschi ubain cun sa participar ad in project captivant. Els pon experimentar en novs champs nunenconuschents, far experientschas, engrondir lur orizont e tscherner pli tard d'ina paletta da professiuns pli ritga. La tscherna daventa ina tscherna per propi.

Chaussas atipicas na datti betg
Tut las scolas da la citad da Cuira sa participeschan al di da l'avegnir, bleras autras vischnancas e numerusas persunas d'instrucziun engaschadas vegnan er a sa participar. Er quest onn datti ina schelta da projects interessants per las scolaras e per ils scolars. Tar la firma Würth ITensis hai num per exempel "Informatica per mattas via!": Duas professiunistas giuvnas introduceschan las mattas en la professiun da l'avegnir "informaticra". Tar la IBW pon mattas er fufragnar tar l'informatica. Mats da lur vart han la pussaivladad d'experimentar in di en ina canorta d'uffants u en ina chasa da persunas attempadas. Quest onn avra per l'emprima giada er la scola auta da pedagogia dal Grischun sias portas per mats interessads: Tenor la devisa "L'avantmezdi student a la scola auta – il suentermezdi persuna d'instrucziun d'ina classa" pon els percurrer a temp accelerà ina scolaziun da persuna d'instrucziun e dastgan star gia il suentermezdi sezs sco magisters davant ina classa.

Ulteriuras infurmaziuns detagliadas chattan tut las parts interessadas – geniturs, manaschis d'emprendissadi e persunas d'instrucziun – sut www.nationalerzukunftstag.ch. Er il post da stab per l'egualitad da las schanzas dal chantun Grischun stat a disposiziun per ulteriuras infurmaziuns.


Infurmaziuns:
- Silvia Hofmann, manadra dal post da stab per l'egualitad da las schanzas, tel. 081 257 35 71 u e-mail Silvia.Hofmann@stagl.gr.ch  
- Claudia Meili-Senn, collavuratura scientifica, tel. 081 257 35 73 u e-mail Claudia.Meili@stagl.gr.ch  


Gremi: post da stab per l'egualitad da las schanzas
Funtauna: rg post da stab per l'egualitad da las schanzas