Dals 6 als 9 da november 2011 ha lieu a Vaduz il segund martgà d'investiziun dal Liechtenstein. A questa occurrenza vegnan preschentadas innovaziuns ed ideas empermettentas ad investiders potenzials. Er interprendidras ed interprendiders grischuns pon profitar da la schanza per sa preschentar a questa occurrenza.

En differents secturs tgira il chantun Grischun ina stretga collavuraziun cun il principadi da Liechtenstein, en spezial er en il sectur da la promoziun da l'innovaziun sco er dal transfer da savida e da tecnologia. La garanzia per finanziar innovaziuns è en quest connex in factur da success impurtant. Savens sa vesan fundaturs d'interpresas innovativs confruntads cun il problem da chattar il chapital d'investiziun necessari. Quai ha per consequenza che innovaziuns ed ideas empermettentas stagneschan en la fasa iniziala u na pon betg vegnir realisadas.

Il martgà d'investiziun dal Liechtenstein duai far frunt a quest svilup. A l'occurrenza che ha lieu dals 6 als 9 da november 2011 en las localitads da l'universitad dal Liechtenstein a Vaduz sa scuntran investiders potenzials ed interprendiders che tschertgan chapital. Ils fundaders d'interpresas preschentan sasez e lur projects davant ils investiders e davant in vast public da perits. En il center stattan dumondas da finanziaziun. Il focus è drizzà sin il metter a disposiziun agen chapital per interpresas. Ultra da las preschentaziuns sa porschan pussaivladads per "far raits", uschia per exempel en discurs singuls arrandschads, en las pausas sco er a l'ur da las occurrenzas da la saira.

Investiders da renum èn preschents al lieu
Il martgà d'investiziun dal Liechtenstein extenda il potenzial dal "private equity" sur ils cunfins naziunals or e promova uschia la creschientscha d'interpresas innovativas europeicas. Uschia pon ils organisaturs gia communitgar la conferma da plirs concerns gronds europeics da renum mundial che vulessan laschar sa persvader al lieu d'innovaziuns e d'ideas empermettentas (per exempel Aster Capital, Blumberg Ventures, Robert Bosch, Mountain Group ed ABB Technology). Ultra dal contact direct d'interpresas e d'investiders stattan en il center er differents referats da represchentantas e da represchentants impurtants d'interpresas che han lur domicil en il Liechtenstein.

Annunzias per il martgà d'investiziun dal Liechtenstein prenda encunter il center dad IPM da l'universitad dal Liechtenstein (e-mail simone.frick@kmu-zentrum.li, tel. 00423 265 12 75). Tant investiders pussaivels resp. finanziaders sco er interprendidras ed interprendiders cun ideas innovativas u singuls start-ups èn envidads da profitar da questa schanza. Ulteriuras infurmaziuns survegnan ins en l'internet sut www.kmu-zentrum.li u sut www.europeanventuremarket.com.


Infurmaziuns:
uffizi per economia e turissem dal Grischun, Eugen Arpagaus, schef da l'uffizi, tel. 079 256 93 94, eugen.arpagaus@awt.gr.ch


Gremi: uffizi per economia e turissem
Funtauna: rg uffizi per economia e turissem